Թբիլիսիում դատապարտել են փոխնակ մայրերին խաբած կլինիկայի ազգությամբ հայ հիմնադիրին

Թբիլիսիի քաղաքային դատարանը 10 տարվա ազատազրկման է դատապարտել «Kinderly Georgia» ընկերության հիմնադիրներին՝ փոխնակ մայրերի և կենսաբանական ծնողների նկատմամբ խարդախության համար։

Դատապարտվածներից մեկը՝ Հայաստանի քաղաքացի Արմեն Մելիքյանը, ձերբակալվել էր 2025 թվականի հոկտեմբերի 1-ին։ Մյուս մեղադրյալը՝ Ուկրաինայի քաղաքացի Ռուսլան Տիմոշենկոն, դատապարտվել է հեռակա կարգով։

Քննության տվյալներով՝ նրանք յուրացրել են ավելի քան 2 միլիոն լարի, որը նախատեսված էր Չինաստանի քաղաքացիների համար երեխաներ կրող փոխնակ մայրերի բժշկական և կենցաղային ծախսերի, ինչպես նաև պայմանագրով նախատեսված վարձատրության վճարման համար։ Վրաստանի ՆԳՆ-ն չի հրապարակել տուժածների թիվը։ Սակայն տեղական լրատվամիջոցների փոխանցմամբ՝ այս տարվա գարնանը մինչև 150 փոխնակ մայրեր դժգոհություններ էին ներկայացրել «Kinderly Georgia»-ի դեմ։

Ըստ Վրաստանի «Ազատություն» ռադիոկայանի՝ որոշ կանայք երեխայի ծնունդից հետո չեն ստացել պայմանագրով նախատեսված մինչև 22 հազար դոլար վարձատրությունը, իսկ մյուսների դեպքում դադարեցվել են առօրյա ծախսերի՝ բնակարանի վարձի, սննդի և կոմունալ վճարների հատկացումները։ Նրանք նաև դժգոհել էին անորակ բժշկական ծառայություններից։ Դատարանը մեղադրյալներին ամբողջությամբ մեղավոր է ճանաչել առանձնապես խոշոր չափերի գումարի յուրացման հոդվածով, որը կատարվել է նախնական համաձայնությամբ գործող խմբի կողմից։