Թուրքիայի մայրաքաղաք Անկարայում ՆԱՏՕ-ի գագաթնաժողովից առաջ անցկացված հականատօյական բողոքի ակցիայի ընթացքում ոստիկանությունը ձերբակալել է ավելի քան 100 մարդու։ Այդ մասին հայտնել է Թուրքիայի կոմունիստական կուսակցությունը։
Կուսակցության տվյալներով՝ բողոքի երթը կազմակերպվել էր Անկարայի Կըզըլայի հրապարակում, իսկ ձերբակալվածների թվում են նաև կուսակցության ղեկավար կազմի ներկայացուցիչներ։ Ցուցարարները «ՆԱՏՕ, դուրս արի մեր երկրից» և «Ո՛չ ՆԱՏՕ-ին» կարգախոսներ են վանկարկել, ինչից հետո ոստիկանությունը ցուցարարներին ցրելու համար կիրառել է արցունքաբեր գազ։
Միաժամանակ հականատօյական ցույցեր են անցկացվել նաև Ստամբուլում: Չնայած ուժեղացված ոստիկանական ներկայությանը՝ Ստամբուլում բախումներ չեն գրանցվել։
Ձերբակալությունները քննադատել են Թուրքիայի քրդամետ «DEM» կուսակցությունը և գլխավոր ընդդիմադիր Ժողովրդահանրապետական կուսակցությունը (CHP)՝ հայտարարելով, որ անվտանգության միջոցները չպետք է սահմանափակեն քաղաքացիների հիմնարար իրավունքները։
Թուրքիայում ՆԱՏՕ-ի գագաթնաժողովը տեղի կունենա հուլիսի 7-8-ը, որին ընդառաջ իշխանությունները խստացրել են անվտանգության միջոցառումները, արգելել հանրահավաքները, փակել մայրաքաղաքի մի շարք փողոցներ։
Հետևեք մեզ տելեգրամում
