ՀՀ կառավարությունը սկսել է Հայաստանի և ԱՄՆ-ի միջև «Թրամփի ուղի՝ հանուն միջազգային խաղաղության և բարգավաճման» (TRIPP) նախագծի շուրջ ռազմավարական համագործակցության շրջանակային համաձայնագրի վավերացման գործընթացը։
Համապատասխան նախագիծը կառավարության նիստում ներկայացրել է ՀՀ արտաքին գործերի նախարար Արարատ Միրզոյանը՝ նշելով, որ որոշման ընդունումից հետո այն սահմանված կարգով կուղարկվի Սահմանադրական դատարան, ապա՝ Ազգային ժողով՝ վավերացման։
Միրզոյանի խոսքով՝ համաձայնագրով նախատեսվում է, որ «TRIPP զարգացման ընկերությունը» կստանա նախագծի գոտիներում հողօգտագործման և կառուցապատման իրավունք՝ նախնական 49 տարի ժամկետով։
Նախարարը հայտնել է, որ այդ ժամանակահատվածում ընկերության բաժնեմասերի 74 տոկոսը կպատկանի ԱՄՆ-ին, իսկ 26 տոկոսը՝ Հայաստանին։ Նրա խոսքով՝ 49-ամյա ժամկետի ավարտից հետո կողմերը կկարողանան համաձայնությամբ երկարաձգել պայմանագիրը ևս 50 տարով, որի դեպքում Հայաստանի մասնաբաժինը կհասնի 49 տոկոսի։
Միաժամանակ Արարատ Միրզոյանը շեշտել է, որ համաձայնագիրը չի սահմանափակում Հայաստանի ինքնիշխան իրավասությունները։
«Հայաստանի Հանրապետությունը կպահպանի իր լիարժեք ինքնիշխանությունն ու լիիրավ իրավազորությունը պետական սահմանի կառավարման, սահմանային վերահսկողության, մաքսային վարչարարության և ՀՀ տարածքում իրականացվող մաքսային բոլոր գործընթացների նկատմամբ», – ասել է նա։
Նրա խոսքով՝ Հայաստանի իրավասության ներքո կմնան նաև անվտանգության և իրավապահ գործունեությունը, սահմանային և միգրացիոն վերահսկողությունը, հարկերի և տուրքերի հավաքագրումն ու պետական բյուջե փոխանցումը, պետական տեղեկատվական համակարգերի գործարկումը, ինչպես նաև պետական վարչական և վերահսկողական գործառույթների իրականացումը։
Հետևեք մեզ տելեգրամում
