Ստամբուլի Այա Սոֆիա տաճարում, որը 2020 թվականից պաշտոնապես վերածվել է մզկիթի, Աստվածաշունչ բարձրաձայն ընթերցելու պատճառով ձերբակալվել է Մոսկվայից ժամանած զբոսաշրջիկ ամուսնական զույգ՝ 35-ամյա Վիկտորյա և 32-ամյա Իգոր Ֆիլոնովները։ Այս մասին հայտնում է «ՏԱՍՍ»-ը:
Հուլիսի 14-ին տեղի ունեցած միջադեպի ժամանակ ոստիկանները նախազգուշացրել են այցելուների գոտում գտնվող ռուսներին, որ տաճարի ներսում քրիստոնեական ծեսերի իրականացումը կամ ոչ մուսուլմանական կրոնական գրականության ցուցադրական ընթերցումը որակվում է որպես հասարակական կարգի խախտում: Նախազգուշացումից հետո իրավապահները շրջապատել և դուրս են բերել ամուսիններին, ապա տեղափոխել ոստիկանական բաժանմունք, որտեղ նրանց նկատմամբ արձանագրություն է կազմվել Թուրքիայի քրեական օրենսգրքի 216-րդ հոդվածով՝ բնակչության շրջանում ատելության կամ թշնամանքի հրահրման մեղադրանքով, ինչը նախատեսում է ազատազրկում վեց ամսից մինչև մեկ տարի ժամկետով, օտարերկրյա քաղաքացիների դեպքում նաև արտաքսում։
Իրավապահները ձերբակալվածներին թույլ չեն տվել վերադառնալ հյուրանոց և տեղավորել են դեպորտացիոն կենտրոնում: Նախատեսվում է, որ հուլիսի 17-ին նրանց կարտաքսեն Ռուսաստան:
Հետևեք մեզ տելեգրամում
