Ուկրաինան ԱԹՍ-ներով հարվածել են Մոսկվային․ կան տուժածներ

Ուկրաինական անօդաչու թռչող սարքերը գիշերը հարձակվել են Մոսկվայի մարզի վրա։ Վնասներ են գրանցվել Պոդոլսկում, Դոմոդեդովոյում և Օդինցովոյում։ Այս մասին հայտնում է «BBC»-ն՝ հղում անելով Մոսկվայի մարզի նահանգապետ Անդրեյ Վորոբյովին։

Նրա խոսքով՝ հակաօդային պաշտպանության ուժերը հետ են մղել հարձակումը, սակայն մի շարք բնակավայրերում արձանագրվել են վնասներ։ Դոմոդեդովոյում մեկ մարդ վիրավորվել է մասնավոր տանը բռնկված հրդեհի հետևանքով, ևս մեկը՝ Մ-4 մայրուղում, որտեղ անօդաչու թռչող սարքի բեկորները վնասել են ավտոմեքենա։

Հիշեցնենք, որ օրեր առաջ ուկրաինական անօդաչու թռչող սարքերը հարվածել էին «Wildberries»-ի պահեստներին Տամբովի և Մոսկվայի մարզերում։ Այդ հարձակումների հետևանքով զոհվել էր ութ մարդ, իսկ տուժածների թիվը գերազանցել էր 80-ը։ Ռուսաստանի իշխանությունները հայտարարել էին, որ թիրախավորվել են քաղաքացիական օբյեկտներ, մինչդեռ Ուկրաինայի նախագահ Վլադիմիր Զելենսկին պնդել էր, որ այդ պահեստներն օգտագործվում էին անօդաչու սարքերի և ռազմական նշանակության սարքավորումների արտադրության համար նախատեսված բաղադրիչների մատակարարման նպատակով։

Հարձակման ֆոնին «Wildberries» ընկերությունը հայտարարել է, որ Պոդոլսկի Կոլեդինո գյուղում գտնվող իր լոգիստիկ համալիրը շարունակում է աշխատել բնականոն ռեժիմով։ Անվտանգության նկատառումներով պահեստը ժամանակավորապես տարհանվել էր, սակայն աշխատակիցներն արդեն վերադարձել են աշխատանքի։

Ուկրաինական լրատվամիջոցները ավելի վաղ հայտնել էին, որ հարձակման թիրախներից մեկը եղել է հենց Պոդոլսկում գտնվող «Wildberries»-ի լոգիստիկ կենտրոնը։