Ուկրաինական անօդաչուները հարվածել են Ռուսաստանի Կրասնոդար քաղաքում գտնվող «Wildberries»-ի լոգիստիկ կենտրոններին։ Հարվածների հետևանքով երկու պահեստներում էլ խոշոր հրդեհներ են բռնկվել։
Ռուսաստանի տեղական իշխանությունների տվյալներով՝ Կրասնոդարում տուժել է երեք, իսկ Նևիննոմիսկում՝ հինգ մարդ։ Կրասնոդարում անօդաչուների բեկորները վնասել են նաև մի քանի բնակելի շենքեր, սակայն այնտեղ տուժածներ չեն եղել։ Նույն գիշեր Կրասնոդարի մարզի Արմավիր քաղաքում ավելի քան 16 անօդաչուով հարձակում է եղել նավթաբազայի վրա։ Հարձակման հետևանքով հրդեհ է բռնկվել մոտ 800 քառակուսի մետր տարածքում․ տուժածների մասին տեղեկություններ չկան։
Հիշեցնենք, որ հուլիսի 18-ին Ուկրաինան հարվածներ էր հասցրել Տամբովի մարզի Կոտովսկում և Մոսկվայի մարզի Էլեկտրոստալում գտնվող «Wildberries»-ի երկու պահեստներին։ Այդ հարձակումների հետևանքով, ռուսական կողմի տվյալներով, զոհվել էր 8, տուժել՝ մոտ 50 մարդ։
Հետևեք մեզ տելեգրամում
