Իրանի Իսլամական հեղափոխության պահապանների կորպուսը (ԻՀՊԿ) հայտարարել է, որ հուլիսի 23-ին Հորմուզի նեղուցի հարավային հատվածով անցնելու փորձ կատարած նավթատարներից մեկը բռնկվել է, իսկ ևս երկուսը հետ են շրջվել։
ԻՀՊԿ ռազմածովային ուժերի տարածած հայտարարության համաձայն՝ երեք նավթատար փորձել են օգտվել այն երթուղուց, որը, ըստ իրանական կողմի, շարունակում է փակ մնալ։ Հայտարարության մեջ նշվում է, որ մեկ նավի վրա տեղի է ունեցել պայթյուն և բռնկվել է ուժեղ հրդեհ, մինչդեռ մյուս երկու նավերը անմիջապես փոխել են ուղղությունը և հեռացել տարածքից։
Իրանական կողմը չի հայտնել անձնակազմի կամ հասցված վնասների վերաբերյալ մանրամասներ։
ԻՀՊԿ-ն նաև նշել է, որ Հորմուզի նեղուցը շարունակում է գտնվել Իրանի վերահսկողության ներքո և փակ կմնա, քանի դեռ, ինչպես նշվում է հայտարարության մեջ, ԱՄՆ-ը շարունակում է իր գործողությունները տարածաշրջանում։ Հայտարարության հեղինակները նշում են, որ առանց Իրանի Իսլամական Հանրապետության հետ համաձայնեցման որևէ նավ չի կարող մուտք գործել կամ դուրս գալ նեղուցից։
Բացի այդ, ԻՀՊԿ-ն ԱՄՆ-ին մեղադրել է առևտրային նավերի անվտանգությունը վտանգելու և համաշխարհային էներգետիկ անվտանգության հետ «խաղալու» մեջ՝ նախազգուշացնելով, որ շարունակական միջամտության դեպքում Իրանը կդիմի պատասխան գործողությունների։
Հետևեք մեզ տելեգրամում
