ՀՀ տարածքային կառավարման և ենթակառուցվածքների նախարարի տեղակալ Քրիստինե Ղալեչյանը հանդիպել է Իրանի ճանապարհաշինության և քաղաքաշինության նախարարի տեղակալ, Ճանապարհային բեռնափոխադրումների կազմակերպության ղեկավար Ռեզա Աքբարիի հետ: Հանդիպման ընթացքում կողմերը մտքեր են փոխանակել երկու երկրների միջև միջազգային տրանսպորտային համագործակցության զարգացման ուղիների շուրջ։ Այս մասին հայտնում է իրանական IRNA լրատվական գործակալությունը:
Մատնանշելով Հայաստանի հետ առևտրային և տրանսպորտային կապերը խորացնելու Թեհրանի քաղաքական կամքը՝ Ռեզա Աքբարին ընդգծել է, որ երկու երկրների նախարարների մակարդակով ինտենսիվ բանակցությունների արդյունքում պատրաստվել է համապարփակ փոխըմբռնման հուշագրի նախագիծ: Ըստ իրանցի պաշտոնյայի՝ փաստաթուղթը կենտրոնացած է ենթակառուցվածքների զարգացման, սահմանային տեղաշարժերի խոչընդոտների վերացման, ճանապարհային տուրքերի նվազեցման կամ չեղարկման, ինչպես նաև տարանցիկ տրանսպորտային միջոցների թողունակության ավելացման հարցերի վրա: Նա հավելել է, որ տարածաշրջանում զուգահեռ միջանցքների գործարկումը և Իրան-Հայաստան-Վրաստան երթուղու ամբողջական ակտիվացումը կարող են էապես մեծացնել առևտրաշրջանառությունը և վճռորոշ դեր խաղալ տարածաշրջանային մատակարարման շղթայում։
Իր հերթին, Քրիստինե Ղալեչյանը, ողջունելով Իրանի հետ տնտեսական և տրանսպորտային փոխգործակցության ընդլայնումը, ներկայացրել է ընթացիկ ենթակառուցվածքային ծրագրերի մանրամասները: ՀՀ նախարարի տեղակալը տեղեկացրել է, որ առաջիկայում նախատեսվում է անցկացնել հերթական մասնագիտական հանդիպումը՝ փոխըմբռնման հուշագրի նախագծի կետերն ու համագործակցության գործնական քայլերը մանրամասն քննարկելու համար, ինչի արդյունքները կհայտարարվեն դիվանագիտական խողովակներով։
Հետևեք մեզ տելեգրամում
