Երուսաղեմում հայկական վանքի մուտքը պղծելուց հետո վեց մարդ է ձերբակալվել

Երուսաղեմի Հին քաղաքի հայկական թաղամասում գտնվող Սուրբ Հակոբյանց վանքի մուտքի մոտ տեղի ունեցած միջադեպից հետո Իսրայելի ոստիկանությունը ձերբակալել է վեց մարդու՝ հինգ անչափահասի և մեկ չափահասի։ Ինչպես հայտնում է «The Times of Israel»-ը, ձերբակալվածները թքել են վանքի մուտքի ուղղությամբ, հարվածել դռանը և քարեր նետել պարսպին։

Միջադեպի ընթացքում դեպքը տեսագրող հայ կնոջ հասցեին հարձակվողները վիրավորական արտահայտություններ են հնչեցրել, իսկ նրանցից մեկը քար է նետել կնոջ ուղղությամբ։

Ձերբակալվածներից երեքին 15 օրով արգելվել է մուտք գործել Հին քաղաք, իսկ մյուս երեքի կալանքը երկարաձգելու հարցով ոստիկանությունը դիմել է Երուսաղեմի դատարան։

«The Times of Israel»-ը նշում է, որ վերջին շրջանում Իսրայելում խնդիր է դարձել քրիստոնյա հոգևորականներին անարգելու և եկեղեցական գույքը վնասելու դեպքերի կանխումը։

Նշենք, որ Սուրբ Հակոբյանց վանքը Երուսաղեմի հայոց պատրիարքի նստավայրն է։