ԱՄՆ Պետդեպարտամենտը Կոնգրեսին տեղեկացրել է արտասահմանում գործող դիվանագիտական հինգ ներկայացուցչություն փակելու ծրագրի մասին, հաղորդում է «Reuters»-ը։ Փակման ենթակա են Գրենադայի Սենթ Ջորջս քաղաքում ԱՄՆ դեսպանատունը, ինչպես նաև ներկայացուցչությունները Ճապոնիայի Նագոյա, Ինդոնեզիայի Մեդան, Կամերունի Դուալա և Կանադայի Վինիպեգ քաղաքներում։
«Reuters»-ի փոխանցմամբ՝ նախատեսվող փակումները հազվադեպ դեպք են, երբ ԱՄՆ-ը միաժամանակ կրճատում է իր դիվանագիտական ներկայությունը մի քանի երկրներում՝ առանց որևէ կոնկրետ աշխարհաքաղաքական իրադարձության հետ կապված պատճառի։
ԱՄՆ-ի դիվանագիտական ներկայության կրճատումը քննադատության է արժանացել դեմոկրատների և արտաքին քաղաքականության ու ազգային անվտանգության ոլորտի որոշ նախկին պաշտոնյաների կողմից։ Նրանց կարծիքով՝ նման քայլերը կարող են թուլացնել ԱՄՆ-ի ազդեցությունը և ստեղծել վակուում, որը կփորձեն լրացնել Չինաստանն ու Ռուսաստանը։
Միաժամանակ, ԱՄՆ պետքարտուղար Մարկո Ռուբիոն ծախսերի կրճատումը ներկայացրել է որպես անհրաժեշտ քայլ՝ Պետդեպարտամենտն ավելի արդյունավետ և փոքր կառույց դարձնելու համար։ Նշենք, որ անցած տարի Պետդեպարտամենտում իրականացվել էր լայնածավալ վերակազմավորում՝ տասնյակ վարչությունների և հարյուրավոր աշխատակիցների կրճատմամբ, սակայն այդ ժամանակ արտասահմանյան որևէ ներկայացուցչություն չէր փակվել։
Հետևեք մեզ տելեգրամում
