ԱՄՆ-ն, Իրանը և Օմանը մոտ են Հորմուզի նեղուցով նավագնացության վերականգնման շուրջ միջանկյալ համաձայնագրի ստորագրմանը: Վաշինգտոնը նախատեսում է գործարքի մասին պաշտոնապես հայտարարել չորեքշաբթի օրը: Այս մասին հայտնում է Axios-ը՝ հղում անելով տարածաշրջանային իր աղբյուրներին և ամերիկացի պաշտոնյայի:
Լրատվամիջոցի աղբյուրների փոխանցմամբ՝ քննարկվող փաստաթուղթը Հորմուզի նեղուցում նախատեսում է 60-օրյա ժամանակավոր կարգավորում, որը հետագայում կարող է երկարաձգվել:
Նախատեսվող համաձայնությամբ սահմանվում են հետևյալ պայմանները.
- Դեպի Պարսից ծոց մտնող բոլոր նավերը կշարժվեն հյուսիսային ուղիով՝ Իրանի տարածքային ջրերով:
- Դեպի Արաբական ծով դուրս եկող նավագնացությունը կիրականացվի հարավային ուղիով՝ Օմանի տարածքային ջրերով, որը կկոորդինացվի Իրանի հետ:
- 60-օրյա ժամանակահատվածում նավերից որևէ վճար կամ տուրք չի գանձվելու:
- 30 օրվա ընթացքում կողմերը նեղուցի կենտրոնական հատվածի ականազերծման աշխատանքներ կիրականացնեն: Այդ հատվածում երթևեկությունը վերջնականապես կկարգավորվի արդեն մշտական համաձայնությամբ:
Մինչ ամերիկյան և տարածաշրջանային աղբյուրները հայտնում են ԱՄՆ-ի ակտիվ ներգրավվածության մասին, իրանական բանակցային թիմին մոտ կանգնած աղբյուրը հերքել է Վաշինգտոնի հետ որևէ ուղղակի բանակցության փաստը:
Իրանական Fars լրատվական գործակալության փոխանցմամբ՝ Թեհրանը Հորմուզի նեղուցի կառավարման ապագա մեխանիզմների շուրջ բանակցում է բացառապես Օմանի հետ: Իրանական աղբյուրի պնդմամբ՝ եթե ԱՄՆ-ն և նրա դաշնակիցները չխանգարեին Իրան-Օման երկկողմ բանակցություններին, կենտրոնական միջանցքի շուրջ համաձայնությունը շատ ավելի արագ կկայանար, սակայն Վաշինգտոնից ստացվող հակասական ազդակները շարունակում են ձգձգել գործընթացը:
Թեհրանում ընդգծում են, որ նույնիսկ Իրան-Օման երկկողմ համաձայնագիրը ինքնին բավարար չէ Հորմուզի նեղուցում լիարժեք անվտանգություն ապահովելու համար: Ըստ իրանական կողմի՝ նեղուցում իրավիճակը չի վերադառնա նախկին հունին, քանի դեռ ԱՄՆ-ն չի դադարեցրել իր «ագրեսիվ գործողությունները» և չի ապահովել Իրանի առաջադրած բոլոր պայմանների կատարումը:
Հիշեցնենք, որ ավելի ԱՄՆ նախագահ Դոնալդ Թրամփը հայտարարել էր, որ հետաձգում է Իրանին հասցվելիք խոշոր ռազմական հարվածները՝ դիվանագիտությանը ժամանակ տալու համար: Միաժամանակ, նա չէր բացառել ռազմական գործողությունների վերսկսումը, եթե համաձայնություն չկայանա:
Հետևեք մեզ տելեգրամում
