Ադրբեջանի նախագահ Իլհամ Ալիևը ստորագրել է օրենք, որով փոփոխություններ են կատարվել Վարչական իրավախախտումների վերաբերյալ օրենսգրքում, ինչպես նաև «Տեղեկատվության պաշտպանության մասին» և «Վնասակար տեղեկատվությունից երեխաների պաշտպանության մասին» օրենքներում։ Փոփոխություններով սահմանվում են երեխաների կողմից սոցիալական ցանցերից օգտվելու նոր կանոններ։ Այս մասին հայտնել են ադրբեջանական ԶԼՄ-ները։
Օրենքի համաձայն՝ մինչև 16 տարեկան անձինք չեն կարողանա ստեղծել անձնական հաշիվներ սոցիալական ցանցերում։ Տարիքային սահմանափակման ենթակա հարթակների ցանկը կհաստատի Ադրբեջանի համապատասխան գործադիր մարմինը։
Սոցիալական հարթակների օպերատորները պարտավոր կլինեն իրականացնել օգտատերերի տարիքի ստուգում։ Դրա համար նախ օգտատերը պետք է հայտարարի իր տարիքը, իսկ այնուհետև այն կհաստատվի էլեկտրոնային փոստի, բջջային հեռախոսահամարի և բանկային քարտի միջոցով։ 16-18 տարեկանների դեպքում պարտադիր կլինի նաև օրինական ներկայացուցչի համաձայնությունը։
Օրենքը նաև սահմանում է, որ 16-18 տարեկան երեխաների համար օրինական ներկայացուցիչները կկարողանան վերահսկել հարթակում ցուցադրվող բովանդակությունն ու գովազդը, սոցիալական ցանցերից օգտվելու ժամերը։ Հարթակները պարտավոր կլինեն ապահովել այդ վերահսկողության համար անհրաժեշտ գործիքները։
Փոփոխություններով նախատեսվում է նաև, որ սոցիալական ցանցերը չեն կարող հավաքագրված անձնական տվյալները պահել կամ փոխանցել երրորդ կողմերին, ինչպես նաև օգտագործել դրանք առևտրային կամ թիրախային գովազդի նպատակներով։ Տարիքի ստուգման ավարտից անմիջապես հետո այդ տվյալները պետք է ջնջվեն։
Օրենքով սոցիալական ցանցերը պարտավորվում են նաև՝
- լռելյայն կիրառել գաղտնիության կարգավորումներ 16-18 տարեկանների հաշիվների համար,
- սահմանափակել աշխարհագրական տեղադիրքի վերաբերյալ տվյալների հասանելիությունը,
- կանխել երեխաների առողջությանը կամ հոգեկան վիճակին վնասող բովանդակության և գովազդի տարածումը,
- արգելել կախվածություն առաջացնող տեսանյութերի ավտոմատ նվագարկման կիրառումը,
- վնասակար բովանդակության հայտնաբերման դեպքում այն հեռացնել կամ սահմանափակել առավելագույնը 24 ժամվա ընթացքում։
Բացի այդ, սոցիալական հարթակները յուրաքանչյուր տարվա հունվարի 15-ին պետք է հաշվետվություն ներկայացնեն լիազոր մարմնին՝ օրենքի պահանջների կատարման վերաբերյալ։
Օրենքը ուժի մեջ կմտնի հրապարակումից 12 ամիս անց։ Այդ ընթացքում հարթակները պետք է ստեղծեն տարիքային ստուգման համար անհրաժեշտ տեխնիկական համակարգերը։
Օրենքի ուժի մեջ մտնելուց հետո սոցիալական ցանցերը պարտավոր կլինեն սահմանափակել մինչև 16 տարեկան երեխաներին պատկանող արդեն գոյություն ունեցող հաշիվների հասանելիությունը։ Եթե չներկայացվի 16 տարին լրացած լինելու հաստատում, այդ հաշիվներն ու դրանց անձնական տվյալները պետք է ջնջվեն, իսկ դրա մասին տեղեկացվի Ադրբեջանի համապատասխան պետական մարմնին։
Հետևեք մեզ տելեգրամում
