ԱՄՆ փոխնախագահ Ջեյ Դի Վենսը հայտարարել է, որ Իրանի հետ խաղաղության բանակցությունները «բարդ» կլինեն և ժամանակ կպահանջեն՝ չնայած Թեհրանը շարունակում է հերքել Վաշինգտոնի հետ բանակցությունների մասին տեղեկությունները: Այս մասին հայտնում է «CNN»-ը։
Վենսը նշել է, որ Իրանում որոշումների կայացման համակարգը բարդ է։ «Իրանցիները չափազանց բարդ գործընկերներ են, և նրանց համակարգը մասնատված է։ Մեր խնդիրն է կողմնորոշվել այդ իրավիճակում և հասնել լավագույն արդյունքի թե՛ ամերիկացի ժողովրդի, թե՛ Միացյալ Նահանգների նախագահի համար»,- ասել է նա։
Վենսի խոսքով՝ վերջնական արդյունքին հասնելը ժամանակ կպահանջի։ «Կարծում եմ՝ ի վերջո նավթի գները կնվազեն և կմնան ցածր մակարդակի վրա, Իրանը երբեք չի ունենա միջուկային զենք, իսկ Միացյալ Նահանգները կլինի ավելի ուժեղ դիրքերում»,- նշել է ԱՄՆ փոխնախագահը։
Միաժամանակ նա ընդգծել է, որ գործընթացը դեռ ընթացքի մեջ է։ «Մենք դեռ խաղի կեսում ենք, և կարծում եմ՝ մարդիկ փորձում են վաղաժամ եզրակացություններ անել, թե ինչպես կավարտվի այս ամենը»,- ասել է Վենսը։
Ավելի վաղ Իրանի փոխարտգործնախարար Քազեմ Ղարիբաբադին հայտարարել էր, որ Թեհրանը դեռևս որոշում չի կայացրել՝ շարունակել արդյոք ԱՄՆ-ի հետ նախկինում ստորագրված փոխըմբռնման հուշագրի իրականացումը։
Հետևեք մեզ տելեգրամում
