2021 թվականին Աֆղանստանում «Թալիբան» շարժման իշխանության գալուց հետո ավելի քան 2,4 միլիոն աղջիկ զրկված է միջնակարգ դպրոց հաճախելու հնարավորությունից։ Այս մասին հայտարարել է ՅՈՒՆԵՍԿՕ-ն, փոխանցում է Deutsche Welle-ն:
Կազմակերպության տվյալներով՝ այս թիվը նախորդ տարվա համեմատ աճել է շուրջ 200,000-ով, և եթե սահմանված արգելքը պահպանվի, ապա մինչև 2030 թվականը կրթությունից զրկված աղջիկների թիվը կարող է հասնել շուրջ 4 միլիոնի։
«Աֆղանստանը մնում է աշխարհում միակ երկիրը, որտեղ աղջիկներին և կանանց պաշտոնապես արգելված է ստանալ միջնակարգ և բարձրագույն կրթություն»-նշել է արտակարգ իրավիճակներում ՅՈՒՆԵՍԿՕ-ի կրթական ծրագրերի համակարգող Հոդա Ջաբերյանը:
Հիշեցնենք, որ «Թալիբանն» իշխանությունը զավթել է 2021 թվականի օգոստոսի 15-ին՝ Աֆղանստանից ԱՄՆ-ի և ՆԱՏՕ-ի ուժերի հեռանալուց հետո։ 2022 թվականի մարտին նրանք աղջիկներին արգելել են միջնակարգ դպրոց հաճախել, իսկ նույն թվականի դեկտեմբերին՝ նաև համալսարաններ։ Թեև թալիբները երկու սահմանափակումներն էլ որակել են որպես «ժամանակավոր», դրանք շարունակում են մնալ ուժի մեջ։
Կրթության ոլորտից բացի, Աֆղանստանում կանայք բախվում են աշխատանքի և ազատ տեղաշարժվելու իրավունքի լուրջ սահմանափակումների: Նրանց արգելված է նաև այցելել հանրային այգիներ, մարզասրահներ և գեղեցկության սրահներ։ ՄԱԿ-ը սահմանափակումների այս լայն համակարգը որակել է որպես «գենդերային ապարտեիդ»։
Հետևեք մեզ տելեգրամում
