Դեպի Ռուսաստան արտահանման սահմանափակումների պայմաններում հայ արտադրողները որպես այլընտրանքային շուկա դիտարկում են Չինաստանը: Չին-հայկական հարաբերությունների տարածաշրջանային զարգացման հիմնադրամը, «Պրոմ Էքսպո» ընկերությունը և Չինաստանում Հայկական առևտրի տունը ձևավորել են լոգիստիկ ենթակառուցվածքներ՝ չինական շուկա հայկական ապրանքների մատակարարման, պահպանման և առաջխաղացման համար: Այս մասին հայտնում է Արմենպրեսը:
Հիմնադրամի նախագահ Սերգեյ Ավանեսովի փոխանցմամբ՝ նախաձեռնության շրջանակում այս տարվա նոյեմբերին Չենդու քաղաքում կկազմակերպվի հայկական ապրանքների տոնավաճառ, որտեղ արտադրողները կկարողանան անմիջական կապեր հաստատել չինացի գնորդների և դիստրիբյուտորների հետ:
Ապրանքների առաջխաղացմանն աջակցելու նպատակով հիմնադրամը «ՑԱՅԳ» հեռուստաընկերության հետ համատեղ գործարկում է «Վարդան Մամիկոնյան» մեդիահարթակը: Արդեն պատրաստվել են չինարեն պատմամշակութային հանդեսն ու տեսահոլովակը, իսկ հետագայում նախատեսվում է նկարահանել երկու երկրների պատմական ու տնտեսական կապերի մասին վավերագրական ֆիլմաշար:
Հետևեք մեզ տելեգրամում
