Հունաստանը Patriot հակաօդային պաշտպանության համակարգ է տեղափոխում Կրետե կղզի՝ Իրանի կողմից Եվրոպայում գտնվող ամերիկյան ռազմակայաններին հնարավոր հարվածների սպառնալիքի ֆոնին։ Այս մասին հայտնում է հունական Kathimerini օրաթերթը, փոխանցում է Al Jazeera-ն։
Համակարգը Կարպատոս կղզուց տեղափոխվում է Կրետեի Սուդա ռազմածովային բազա՝ տարածքի հակաօդային պաշտպանությունն ուժեղացնելու նպատակով։ Ըստ աղբյուրի՝ որոշումը կայացվել է Եվրոպայի տարածքում գտնվող ամերիկյան ռազմակայաններին իրանական հնարավոր հարվածների մասին լուրերից հետո։
Օրաթերթի փոխանցմամբ՝ Հունաստանի պաշտպանության նախարարությունն ու զինված ուժերի գլխավոր շտաբը նախորդ շաբաթվանից բարձր պատրաստվածության վիճակում են։ Հունական կողմը գնահատում է հնարավոր սպառնալիքների մակարդակը և վերանայում է երկրի կարևոր ենթակառուցվածքների պաշտպանության միջոցները։
Ըստ հունական աղբյուրի՝ դաշնակիցների գնահատմամբ՝ Իրանը դեռևս ունի զգալի թվով բալիստիկ հրթիռներ, որոնց խոցման հեռահարությունը գերազանցում է 2000 կիլոմետրը։ Դա տեսականորեն այդ հրթիռների հասանելիության գոտում է թողնում նաև Հարավարևելյան Եվրոպայի ենթակառուցվածքները։ Միաժամանակ Հունաստանի պաշտպանության նախարարությունը քննարկում է Սաուդյան Արաբիայի Յանբու քաղաքում տեղակայված հունական Patriot ստորաբաժանման առաքելության երկարաձգման կամ դադարեցման հարցը։
Հունական ստորաբաժանումը Սաուդյան Արաբիայում տեղակայված է 2021 թվականի սեպտեմբերից։ Kathimerini-ի տեղեկություններով՝ ներկայում առավել հավանական է համարվում ստորաբաժանումը Հունաստան վաղաժամ վերադարձնելու տարբերակը։
Հետևեք մեզ տելեգրամում
