Թուրքիայի նախագահականի ապատեղեկատվության դեմ պայքարի կենտրոնը հայտարարություն է տարածել՝ անդրադառնալով հայկական դպրոցների նկատմամբ սահմանափակումների վերաբերյալ հրապարակումներին։
Կենտրոնի հայտարարության մեջ նշվում է, որ սոցիալական մեդիայի որոշ հաշիվներում և լրատվամիջոցներում տարածվող այն հրապարակումները, որոնք «տպավորություն են ստեղծում, թե փոքրամասնությունների դպրոցները տարբեր սահմանափակումներով հատուկ թիրախավորվում են», ապատեղեկատվություն են պարունակում և, ըստ կենտրոնի, «ուղղված են հասարակական անդորրի ու միասնականության դեմ»։
«Այս դպրոցների նկատմամբ համապատասխան օրենքով սահմանված դրույթներից բացի որևէ նոր կարգավորում չի կիրառվում, և դպրոցները շարունակում են իրենց կրթական գործունեությունը», – ասվում է հայտարարության մեջ։
Հիշեցնենք, որ օրերս «Ակոս» շաբաթաթերթը հայտնել էր, որ Թուրքիայի ազգային կրթության նախարարության տեսուչները ստուգումներ են անցկացրել Ստամբուլի հայկական դպրոցներում և տնօրեններին տեղեկացրել, որ դպրոցներն այլևս չեն կարող Հայաստանից եկած «հյուր աշակերտներ» ընդունել, իսկ այնտեղ սովորող ՀՀ քաղաքացի երեխաները պետք է կրթությունը շարունակեն պետական դպրոցներում։
Հետևեք մեզ տելեգրամում
