Հայաստանի վարչապետ Նիկոլ Փաշինյանը օգոստոսի 31-ին Բիշքեկում հանդիպել է Հնդկաստանի վարչապետ Նարենդրա Մոդիի հետ։ Այս մասին հայտնել է ՀՀ կառավարության ֆեյսբուքյան էջը։
Հանդիպման ընթացքում կողմերը գոհունակությամբ ընդգծել են Հայաստան-Հնդկաստան հարաբերությունների զարգացումը և կարևորել փոխգործակցությունը նոր մակարդակի բարձրացնելու ուղղությամբ համատեղ քայլերի իրականացումը։
Փաշինյանն ու Մոդին նշել են, որ երկու երկրների միջև բարեկամությունը միշտ եղել է ամուր, և պատրաստակամություն են հայտնել շարունակել ջանքերը՝ այն ավելի խորացնելու համար։ Զրուցակիցները քննարկել են տնտեսական, տեխնոլոգիական, առողջապահության և դեղագործության, կրթության, ենթակառուցվածքների, ներդրումների և զբոսաշրջության ոլորտներում համագործակցության ընդլայնման հնարավորությունները։
Կողմերը կարևորել են բարձր մակարդակի փոխադարձ այցելությունների շարունակական կազմակերպումը՝ գործընկերության խորացման և համատեղ նոր ծրագրերի իրականացման նպատակով։ Փաշինյանը վերահաստատել է Մոդիին Հայաստան այցելելու հրավերը՝ հարմար ժամանակահատվածում, և իր հերթին պատրաստակամություն հայտնել պատեհ առիթով այցելել Հնդկաստան։
Հանդիպման ընթացքում կողմերը մտքեր են փոխանակել նաև տարածաշրջանային նշանակության մի շարք հարցերի շուրջ։ Մասնավորապես, անդրադարձ է կատարվել «Թրամփի ուղի՝ հանուն միջազգային խաղաղության և բարգավաճման» (TRIPP) նախագծի իրականացման ընթացքին։
Հետևեք մեզ տելեգրամում
