Ռուսաստանի Նովոռոսիյսկ քաղաքում ԱԹՍ-ների զանգվածային հարձակման հետևանքով չորս մարդ է զոհվել, այդ թվում՝ երեխա, ևս 29 մարդ տուժել է։ Այս մասին սեպտեմբերի 9-ին հայտնել է Կրասնոդարի երկրամասի նահանգապետ Վենիամին Կոնդրատևին։ Նրա խոսքով՝ տուժածներից երեքի վիճակը ծանր է։
Հարձակման հետևանքով վնասվել են երեք առանձնատուն և հինգ բազմաբնակարան շենք, ինչպես նաև ուղղափառ եկեղեցու և մանկապարտեզի շենքերը։ Նովոռոսիյսկի քաղաքապետ Անդրեյ Կրավչենկոյի խոսքով՝ անօդաչուների բեկորներ են ընկել ձեռնարկությունների տարածքներում և բնակելի շենքի մոտ։
«ASTRA»-ի՝ բաց աղբյուրների ուսումնասիրության համաձայն՝ հարձակումից հետո Նովոռոսիյսկում հրդեհ է բռնկվել մազութի տերմինալում։ Հրդեհ է գրանցվել նաև քաղաքի բազմաբնակարան շենքերից մեկում։
Կրասնոդարի երկրամասի մյուս բնակավայրերում ևս հարձակման հետևանքներ են գրանցվել։ Կոնդրատևի խոսքով՝ Անապայում ԱԹՍ-ի բեկորների հետևանքով վնասվել են երեք առանձնատուն և մանկապարտեզ։ Տուժածներ չկան։ Հարձակման հետևանքները վերացվում են նաև Կրիմսկի և Տեմրյուկի շրջաններում:
Հետևեք մեզ տելեգրամում
