ԱՄՆ նախագահ Դոնալդ Թրամփը հայտարարել է, որ եթե Հանրապետական կուսակցությունը հաղթանակ տանի նոյեմբերին կայանալիք Կոնգրեսի միջանկյալ ընտրություններում, յուրաքանչյուր չափահաս ամերիկացի կստանա 5000 դոլար։ Այս մասին հայտնում է «Reuters»-ը։
Թրամփն այս առաջարկն արել է Հանրապետական կուսակցության միջանկյալ ընտրություններին նվիրված առաջին համաժողովի ժամանակ՝ այն անվանելով «Թրամփի դիվիդենտ»։ Միևնույն ժամանակ, դեռևս պարզ չէ, թե ինչպես կարող է իրականացվել այդ վճարումը և արդյոք այն իրավական հիմք կունենա։
«Reuters»-ի հաշվարկով՝ ԱՄՆ-ում մոտ 270 միլիոն չափահաս բնակչության պարագայում նման ծրագիրը կարող է արժենալ շուրջ 1.35 տրիլիոն դոլար։
Մոտ մեկ ժամ 45 րոպե տևած ելույթի ընթացքում Թրամփը հայտարարել է, որ իր նախագահության երկու տարիները «նախագահության պատմության մեջ ամենամեծ երկու տարիներն են»՝ այդպիսով իրեն կենտրոնական դեր վերապահելով առաջիկա ընտրարշավում։
«Եթե Ամերիկայի ապագան հանձնենք արմատական ձախ դեմոկրատներին, մեր երկիրը հաջորդ տասնամյակը կծախսի՝ պարզապես ոտքի կանգնելու համար։ Քվեարկեք հանրապետականների օգտին, և մենք սերունդների ընթացքում աշխարհին մեզնից հետք կթողնենք», – ասել է Թրամփը։
Թրամփը հայտարարել է, որ ընտրություններից առաջ նախատեսում է այցելել առանցքային նահանգներ և ընտրական շրջաններ։ Նա, դիմելով հանրապետական ընտրողներին, ասել է. «Ես խնդրում եմ ձեզ պատկերացնել, որ ես եմ քվեաթերթիկում»։
Հետևեք մեզ տելեգրամում
