ԱՄՆ-ը մերժել է Պաղեստինի նախագահ Մահմուդ Աբբասին և Պաղեստինի ինքնավարության տասնյակ պաշտոնյաների ԱՄՆ մուտքի վիզաների տրամադրումը, ինչի հետևանքով նրանք չեն կարողանա մասնակցել ՄԱԿ-ի Գլխավոր ասամբլեայի՝ հաջորդ շաբաթ Նյու Յորքում կայանալիք նիստին: Այս մասին հայտնում է Euronews-ը:
ԱՄՆ Պետդեպարտամենտը հայտարարել է, որ Պաղեստինի պաշտոնյաները, այդ թվում՝ Աբբասը, չեն կատարել Իսրայելի հետ խաղաղության հասնելու վերաբերյալ նախկինում ստանձնած պարտավորությունները։ Գերատեսչության հայտարարության համաձայն՝ Պաղեստինի իշխանությունների կողմից անհրաժեշտ բարեփոխումների չիրականացման և «խաղաղության հեռանկարները խաթարող գործողությունների» պատճառով Վաշինգտոնը երկարաձգում է Պաղեստինի ազատագրման կազմակերպության անդամների և Պաղեստինի ինքնավարության պաշտոնյաների նկատմամբ վիզաների սահմանափակումները։
Պաղեստինի արտաքին գործերի նախարարությունը դատապարտել է Վաշինգտոնի որոշումը՝ այն անվանելով «չարդարացված միջոց» և նշելով, որ այն հակասում է վստահության վերականգնման, պաղեստինա-ամերիկյան հարաբերությունների զարգացման, ինչպես նաև խաղաղության հասնելու համար անհրաժեշտ քաղաքական պայմանների ձևավորման ջանքերին։
Միևնույն ժամանակ, Պաղեստինի ներկայացուցիչները կկարողանան մասնակցել ՄԱԿ-ի բարձր մակարդակի հանդիպմանը։ Նյու Յորքում Պաղեստինը կներկայացնեն ՄԱԿ-ում արդեն հավատարմագրված դիվանագետները, իսկ Աբասը, ինչպես ակնկալվում է, կրկին հանդես կգա տեսաուղերձով։
Նշենք, որ սա արդեն երկրորդ տարին է, երբ Աբասին թույլ չի տրվում մեկնել Նյու Յորք։ 2025 թվականին նա նիստին մասնակցել էր տեսաուղերձի միջոցով։
Հետևեք մեզ տելեգրամում
