Մեծ Բրիտանիան լրացուցիչ ռազմական աջակցություն կտրամադրի Սաուդյան Արաբիային՝ Եմենի հութի ապստամբների հարձակումներից պաշտպանվելու համար։ Երկիրը կուղարկի «Eurofighter Typhoon» կործանիչներ, որոնք կօգտագործվեն ոչ թե հարվածներ հասցնելու, այլ Սաուդյան Արաբիայի քաղաքներն ու կարևոր ենթակառուցվածքները հրթիռներից և անօդաչու թռչող սարքերից պաշտպանելու նպատակով։ Այս մասին հոկտեմբերի 20-ին հայտնել է Մեծ Բրիտանիայի պաշտպանության նախարարությունը, գրում է «Deutsche Welle»-ն։
Մեծ Բրիտանիայի պաշտպանության նախարար Ուես Սթրիթինգը դատապարտել է հութինների շարունակվող հարձակումները՝ դրանք որակելով անընդունելի։ Նա, մասնավորապես, նշել է Էր Ռիադի օդանավակայանի ուղղությամբ հարվածները, որոնք, նրա խոսքով, ցույց են տալիս, թե որքան հեռու են գնում ապստամբները տարածաշրջանում իրավիճակը սրելու համար։
Բացի կործանիչներից՝ Մեծ Բրիտանիան Սաուդյան Արաբիա կուղարկի նաև «Airbus A400M» ռազմատրանսպորտային ինքնաթիռ՝ ռազմական տեխնիկայի տեղափոխման համար, ինչպես նաև ռազմական խորհրդականներ։
Հիշեցնենք, որ հոկտեմբերի 10-ին Էր Ռիադի՝ Խալիդ թագավորի անվան միջազգային օդանավակայանը հրթիռակոծվել էր։ «Deutsche Welle»-ի տվյալներով՝ հարձակման հետևանքով 13 մարդ զոհվել էր, ևս 308-ը՝ վիրավորվել։ Հութինները ստանձնել էին հարձակման պատասխանատվությունը և հայտարարել Սաուդյան Արաբիայի օդային տարածքը ռազմական գործողությունների գոտի։
Սեպտեմբերին Իրանի դաշնակից հութինները հայտարարել էին Մերձավոր Արևելքում ռազմական գործողություններն ընդլայնելու մասին։ Նրանք հարվածներ էին հասցրել Սաուդյան Արաբիայի հարավում գտնվող չորս քաղաքների, ինչի հետևանքով ավելի քան 70 մարդ էր տուժել, իսկ նավթային օբյեկտներում հրդեհներ էին բռնկվել։ Ի պատասխան՝ Սաուդյան Արաբիան ավելի քան 60 օդային հարված էր հասցրել Եմենի՝ ապստամբների վերահսկողության տակ գտնվող շրջաններին։
Հետևեք մեզ տելեգրամում
