Սիրիայի խորհրդարանի պատգամավոր Նորա Արիսյանը եգիպտական «masr.masr360.net» կայքին տված հարցազրույցում հայտարարել է, որ սիրիացի ժողովուրդը, այդ թվում հայերը, տուժել են անցած ինը տարիների ընթացքում երկրին հարվածած ահաբեկչական պատերազմի հետևանքով, քանի որ վնասվել են նրանց տները, դպրոցներն ու եկեղեցիները, մի մասը արտագաղթել է, մի մասն էլ գնացել Հայաստան:
Հարցազրուցի ընթացքում անդրադարձ է եղել Սիրիայի խորհրդարանի կողմից Հայոց ցեղասպանությունը ճանաչման փաստին, որին ի պատասխան Արիսյանը նշել է, որ Սիրիան ականատեսն է օսմանցիների հանցագործությունների, և Սիրիա-Հայաստան բարեկամության հանձնախումբը խորհրդարանի նախագահությանն էր ուղարկել Հայոց ցեղասպանությունը ճանաչելու օրինագիծն օրակարգ ընդգրկելու որոշումը, որն ընդունվեց փետրվարի 13-ին:
Արիսյանի խոսքով` այս պատմական որոշումը ունի ինչպես քաղաքական բնույթ՝ կապված Թուրքիայի բացասական և ահաբեկչական պահվածքի հետ, այնպես էլ սոցիալական՝ հաշվի առնելով այն հարաբերությունները, որոնք հայ և սիրիացի ժողովուրդներին կապում են դարեր շարունակ:
Անդրադառնալով թուրք-սիրիական հարաբերություններին՝ Արիսյանը նշել է, որ դրանք շատ բարդ փուլ են վերապրել, և Հայոց ցեղասպանության ճանաչման որոշումը չնչին բան է՝ համեմատած այն բանի հետ, ինչ Թուրքիան արեց Սիրիայում՝ աջակցելով ահաբեկչությանը և մինչ այժմ շարունակում է ագրեսիվ քաղաքականություն վարել երկրի դեմ: « Թուրքիան տարածաշրջանում միշտ ձգտել է հասնել իր օսմանյան հավակնություններին և իրագործել իր նպատակները Սիրիայում՝ իր կողմից վերահսկվող տարածքներում ներմուծելով իր արժույթը, ուսումնական ծրագրերը, իրականացնելով ժողովրդագրական փոփոխություններ և ագրեսիվ ընդլայնման այլ դրսևորումներ»,-ասել է Արիսյանը:
Հարցին, թե արդյոք Հայոց ցեղասպանության միջազգային ճանաչումը ճնշում կլինի Թուրքիայի վրա, Արիսյանը պատասխանել է, որ ցեղասպանության ճանաչումը միջազգային փաստաթուղթ է Թուրքիայի վրա ճնշում գործադրելու համար, հատկապես այն փաստերը, որոնք հաստատում են, որ այն, ինչ տեղի ունեցավ 1915թ.-ին, օսմանյան թուրքերի կողմից ցեղասպանություն էր հայերի դեմ:
Հետևեք մեզ տելեգրամում
