Ռուսաստանի Դաշնության արգործնախարարության մամուլի խոսնակ Մարիա Զախարովան ամենօրյա ճեպազրույցի ժամանակ հայտնել է, որ ՌԴ ԱԳ նախարար Սերգեյ Լավրովը դեկտեմբերի 2-3–ին պաշտոնական այցով կլինի Բաքվում: Այցի ընթացքում Լավրովը կհանդիպի Ադրբեջանի նախագահ Իլհամ Ալիևի, ինչպես նաև՝ իր ադրբեջանցի պաշտոնակից Էլմար Մամեդյարովի հետ։
«Համաձայն ձեռք բերված պայմանավորվածության՝ Ռուսաստանի արտգործնախարար Սերգեյ Լավրովը դեկտեմբերի 2-3-ին պաշտոնական այցով կայցելի Բաքու։ Ռուսաստանի արտաքին գերատեսչության ղեկավարի այցի ծրագրում նախատեսված են հանդիպումներ Ադրբեջանի նախագահի և բանակցություններ այդ երկրի արտգործնախարարի հետ։ Կշարունակվի երկխոսությունը երկկողմ հարաբերությունների առանցքային հարցերի շուրջ՝ քաղաքական, տնտեսական, մշակութային ու հումանիտար ոլորտներում։ Նաև նախատեսվում է երկու երկրների արտաքին գերատեսչությունների միջև 2020թ․ խորհրդակցությունների ծրագրի ստորագրում», – տեղեկացրել է Զախարովան։
Այցի ընթացքում կողմերը կքննարկեն միջազգային տարբեր կառույցների շրջանակներում երկկողմ հարաբերությունների զարգացումը, ինչպես նաև՝ տարածաշրջանային անվտանգությանն ու Լեռնային Ղարաբաղի հակամարտությանն առնչվող խնդիրներ։
ՌԴ ԱԳՆ խոսնակը ընդգծել է, որ Ռուսաստանի և Ադրբեջանի միջև մշտապես բարձր մակարդակի երկխոսություն է ընթանում։ Միայն 2019թ․ Ռուսաստանի և Ադրբեջանի նախագահները միջազգային ֆորումների շրջանակներում հանդիպել են երկու անգամ՝ Պեկինում ապրիլի 26-ին և Սոչիում հոկտեմբերի 3-ին։ Բացի այդ՝ նոյեմբերի 20-25-ը կայացել է Ադրբեջանի առաջին փոխնախագահ Մեհրիբան Ալիևայի այցը ՌԴ։
Հետևեք մեզ տելեգրամում
