Ռուսաստանի ԱԳՆ պաշտոնական ներկայացուցիչ Մարիա Զախարովան լրագրողների հետ ճեպազրույցում հայտարարել է, որ Մոսկվան Լեռնային Ղարաբաղի հակամարտության կողմերին կոչ է անում զսպվածություն ցուցաբերել և տարածաշրջանում իրավիճակը գործնականում տանել ապասկալացման:
Զախարովան նշել է, որ այս պահին Ղարաբաղյան հակամարտության գոտի են տեղափոխվում ահաբեկչական կազմակերպությունների անդամներ, որոնց ձեռքերն արյան մեջ են թաթախված:
«Ըստ մեր ունեցած տվյալների՝ այս պահին Մերձավոր Արևելքից ահաբեկչական կազմակերպությունների անդամներ են տեղափոխվում Ղարաբաղյան հակամարտության գոտի, որոնց ձեռքերը մինչև արմունկ թաթախված են արյան մեջ»,-ասել է Զախարովան՝ նշելով, որ խոսքը ծայրահեղական տրամադրված վարձկանների մասին է, որոնք ջիհադի գաղափար են քարոզում:
«Այդ ամենը չի կարող լուրջ չմտահոգել Մոսկվային, քանի որ իրադարձությունների նման զարգացումը կարող է հանգեցնել Անդրկովկասում ահաբեկչական անկլավի առաջացմանը: Դրա մասին Ռուսաստանը բացահայտ հայտարարել է անմիջապես այն բանից հետո, երբ իր տրամադրության տակ են հայտնվել այդ տվյալները»,-ասել է Զախարովան:
Նշենք, որ օրեր առաջ ՌԴ ԱԳ նախարար Սերգեյ Լավրովը հայտնել էր, որ Մերձավոր Արևելքից շուրջ 2000 գրոհային է տեղափոխվել Լեռնային Ղարաբաղի հակամարտության գոտի:
Հետևեք մեզ տելեգրամում
