Ադրբեջանը բազմաթիվ հայ ռազմագերիների է թաքցնում Կարմիր Խաչի միջազգային կոմիտեից և հարազատներից։ Այս մասին տեղեկացնում է Արցախի մարդու իրավունքների պաշտպան Արտակ Բեգլարյանը՝ թվիթերյան իր էջում կատարված գրառմամբ։
«Հիմնվելով մեր հավաստի տվյալների և վերլուծության վրա՝ Ադրբեջանը բազմաթիվ հայ ռազմագերիների է թաքցնում Կարմիր Խաչի միջազգային կոմիտեից և հարազատներից։
Գոյություն ունեն նրանց նկատմամբ ազգային պատկանելիության հիմքերով անմարդկային վերաբերմունքի բազմաթիվ վիդեո ապացույցներ:
Միջազգային դիտորդական բոլոր մարմինները պետք է կանխեն այնտեղի խոշտանգումները և պատերազմական հանցագործությունները»,- գրել է նա՝ դիմելով ՄԱԿ Մարդու իրավունքների խորհրդին և Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման եվրոպական կոմիտեին։
Ավելի վաղ Արցախի ՄԻՊ-ը հայտնել էր, որ 50-60 հայ ռազմագերի կա, սակայն հայտնի է նրանցից մոտ 30-ի ինքնությունը, բացի այդ, սպանվել է գերության մեջ գտնվող 11 քաղաքացիական անձ։ Բեգլարյանի խոսքով՝ Ադրբեջանն ակնհայտ ժամանակ է ձգում՝ մարմինների և գերիների փոխանակման առնչությամբ՝ փորձելով հայերի շրջանում հոգեբանական տառապանքներն ավելի խորացնել։
Հետևեք մեզ տելեգրամում
