Ռուսաստանը պատրաստ է խորհրդակցություններ անցկացնել Հայաստանի և Ադրբեջանի միջև սահմանների դելիմիտացիայի և դրան հաջորդող դեմարկացիայի աշխատանքներում՝ երկու երկրների միջև հակամարտության շուտափույթ կարգավորման նպատակով: Այս մասին լրագրողների հետ ճեպազրույցում ասել է ՌԴ ԱԳՆ խոսնակ Մարիա Զախարովան:
«Մենք մեկ անգամ չէ, որ ընդգծել ենք, որ որպես տվյալ խնդրի կայուն և երկարաժամկետ լուծումը մենք տեսնում ենք Հայաստանի և Ադրբեջանի միջև սահմանների դելիմիտացիայի և դրան հաջորդող դեմարկացիայի աշխատանքների շուտափույթ վերսկսմամբ: Մենք պատրաստ ենք անհրաժեշտ խորհրդատվություններ տրամադրել, և ներկայում շարունակվում են շփումները արտաքին քաղաքականության և պաշտպանության գերատեսչությունների միջև, ինչպես նաև սահմանապահ ծառայությունների, այդ թվում լարվածության թուլացման նպատակով»,-ասել է Զախարովան:
Նրա խոսքով, Ռուսաստանը չի կարծում, որ երկու երկրների սահմաններին ստեղծված իրավիճակը ուղիղ կապ ունի Լեռնային Ղարաբաղի հակամարտության կարգավորման հետ, և ավելի շուտ սահմանի իրավական ձևակերպման բացակայության հետևանք է։ «Մենք հիմք ենք ընդունում, որ հայ-ադրբեջանական սահմանի առանձին հատվածներում ստեղծված իրավիճակը ուղիղ կապված չէ ԼՂ հակամարտության կարգավորման հետ և ավելի շուտ սահմանի իրավական ձևակերպման բացակայության հետևանք է: Ընդհանուր ֆոնը, անխոս, խորացնում է փոխադարձ վստահության բացակայությունը, դա իսկապես այդպես է»,-ավելացրել է Զախարովան:
Հետևեք մեզ տելեգրամում
