Թուրքիան համագործակցում է Կատարի և ԱՄՆ-ի հետ՝ Աֆղանստանի մայրաքաղաք Քաբուլում օդանավակայանի կառավարման հարցում։ Այս մասին այսօր հայտարարել է Թուրքիայի արտգործնախարար Մևլութ Չավուշօղլուն:
Չավուշօղլուի խոսքով՝ թալիբները կարող են անվտանգություն ապահովել Քաբուլի օդանավակայանից դուրս, սակայն դրա ներսում անվտանգությունը պետք է երաշխավորի «անվտանգության ընկերությունը կամ մեկ կամ երկու պետությունները, որոնց վստահում է միջազգային հանրությունը»: Թուրքիայի արտգործնախարարը նաև հավելել է, որ «ներկայումս 19 [թուրք] տեխնիկներ շարունակում են աշխատել Քաբուլի օդանավակայանում»:
«Մենք աշխատում ենք Կատարի և ԱՄՆ-ի հետ՝ Քաբուլի օդանավակայանի կառավարման ուղղությամբ: Ներկայումս օդանավերը կարող են օդ բարձրանալ և վայրէջք կատարել օդանավակայանում: Որոշ ավիաընկերություններ արդեն վերսկսել են թռիչքները», – ասել է նա:
Ավելի վաղ Թուրքիան բազմիցս արտահայտել էր իր ցանկությունը. շարունակել պատասխանատվությունը Քաբուլի օդանավակայանի անվտանգության և շահագործման համար, եթե ստեղծվեն համապատասխան պայմաններ: Ըստ վերջին հաղորդագրությունների՝ թալիբները Կատարին և Թուրքիային դիտարկում են որպես երկրներ, որոնք կարող են տեխնիկապես շահագործել Քաբուլի օդանավակայանը:
Հետևեք մեզ տելեգրամում
