Իրաքի ընտրական բարձրագույն հանձնաժողովը հոկտեմբերի 25-ին հայտարարել է, որ չորեքշաբթի սկսելու է որոշ ընտրատեղամասերում ձայների վերահաշվարկները, որտեղ կան ամենաշատ բողոքները ընտրությունների հրապարակված վերջնական արդյունքների հետ կապված: Այս մասին տեղեկացնում է իրաքյան պետական INA լրատվական գործակալությունը:
Ինչպես հաղորդում է աղբյուրը՝ ընտրական հանձնաժողովը անցած շաբաթ հրապարակել էր ընտրությունների վերջնական արդյունքները՝ ավարտելով ձայների ձեռքով հաշվարկները բոլոր այն ընտրատեղամասերում, որտեղ տեխնիկական խնդիրների պատճառով էլեկտրոնային տարբերակը բացակայել է: Այս հանգամանքը նույնպես նպաստել է կուսակցությունների բողոքների ավելացմանը: Նշենք, որ ընտրական հանձնաժողովը ստացել է 483 բողոքներ, որոնցից 461-ը մերժել է:
Հիշեցնենք, որ Իրաքում խորհրդարանական ընտրությունները կայացել են հոկտեմբերի 10-ին: Համաձայն նախնական արդյունքների՝ խորհրդարան անցած կուսակցություններն են «Ալ-Սադր շարժում» կուսակցությունը, «Թակադում», կուսակցությունը, Քուրդիստանի ժողովրդավարական կուսակցությունը և «Օրենքի երկիր» դաշինքը: Իրանամետ կուսակցությունները միացել էին «Հաշդ Ալ-Շաաբի» կուսակցությանը՝ կազմելով Ալ-Ֆաթահ դաշինքը, որը, սակայն, հաջողություն չունեցավ ընտրություններում: Նրանց աջակիցները և համախոհները բողոքի ցույցեր էին իրականացնում Բաղդադում:
Հետևեք մեզ տելեգրամում
