Նոյեմբերի 5-ին Իրաքի մայրաքաղաք Բաղդադում տեղակայվել են անվտանգության ուժեր ընտրությունների արդյունքների վերահաշվարկի դեմ անցկացվող ցույցերի համար, տեղեկացնում են իրաքյան ԶԼՄ-ները՝ հղում անելով տեղական աղբյուրներին:
Իրաքի խորհրդարանական ընտրություններում պարտված քաղաքական ուժերը չեն ճանաչում ընտրությունների արդյունքները և մեղադրում են Իրաքի ընտրական հանձնաժողովին ձայների վերահաշվարկի գործընթացում կասկածելի դեր ունենալու մեջ: Նրանք հայտարարել են, որ պատրաստվում են խաղաղ ցույցեր անցկացնել Բաղդադում և Իրաքի տարբեր նահանգներում: Այդ իսկ պատճառով մայրաքաղաքի Թահրիր հրապարակում և Ջումհուրիյա կամրջի մոտակայքում ուժեր են տեղակայվել՝ անվտանգության նկատառումներից ելնելով, գրում է Al Arabiya-ն:
Համաձայն աղբյուրի՝ շիայական կուսակցությունների՝ «Ալ-Ֆաթահ», «Օրենքի երկիր», «Հաղթանակ» դաշինքների առաջնորդները հանդես են եկել համատեղ հայտարարությամբ, որում մեղադրում են ընտրական հանձնաժողովին բողոքների և ներկայացված ապացույցների ոչ պատշաճ դիտարկման մեջ: Համատեղ հայտարարությունը նաև կոչ է անում Իրաքի տարբեր հատվածներում խաղաղ ցույցեր իրականացնել ի նշան անհամաձայնության:
Հիշեցնենք, որ Իրաքում խորհրդարանական ընտրությունները կայացել են հոկտեմբերի 10-ին: Համաձայն նախնական արդյունքների՝ խորհրդարան անցած կուսակցություններն են «Ալ-Սադր շարժում» կուսակցությունը, «Թակադում», կուսակցությունը, Քուրդիստանի ժողովրդավարական կուսակցությունը և «Օրենքի երկիր» դաշինքը: Իրանամետ շիայական կուսակցությունները միացել էին «Հաշդ Ալ-Շաաբի» կուսակցությանը՝ կազմելով Ալ-Ֆաթահ դաշինքը, որը, սակայն, հաջողություն չունեցավ ընտրություններում: Այնուհետև ընտրությունների արդյունքների դեմ բողոքներով պայմանավորված՝ Իրաքի ընտրական բարձրագույն հանձնաժողովը երկրի տարբեր նահանգներում իրականացրել է ձայների վերահաշվարկ, որը դեռևս շարունակվում է:
Հետևեք մեզ տելեգրամում
