Սիրիայի արտգործնախարար Ֆայսալ Ալ-Միկդադի գլխավորած պատվիրակությունը իրանական կողմի հրավերով մեկնել է Թեհրան: Պատվիրակության կազմում է նաև փոխարտգործնախարար Բաշար ալ-Ջաֆարին:
Սա Միկդադի առաջին այցն է Թեհրան Իրանի նախագահ Իբրահիմ Ռայիսիի՝ նախագահի պաշտոնը ստանձնելուց հետո: Այն կարևոր «քայլ է՝ ամրապնդելու ռազմավարական հարաբերությունները երկու երկրների միջև», գրում է տեղական Al Watan թերթը:
Իրանի ԱԳՆ խոսնակ Սայիդ Խաթիբզադեն իր հերթին հաստատել է, որ դեկտեմբերի 5-ի երեկոյան սիրիական պատվիրակությունը ժամանել է Թեհրան:
Նշենք, որ օրեր առաջ Դամասկոս էր ժամանել Իրանի արդյունաբերության նախարար Ռեզա Ֆատեմիի գլխավորած պատվիրակությունը: Սիրիա կատարած այցի շրջանակներում Ֆատեմին մասնակցել էր Դամասկոսում Իրանի մասնագիտացված ցուցադրության (որին մասնակցում են 164 իրանական կազմակերպություններ և ներկայացնում իրենց արտադրանքները) բացման արարողությանը և Իրանի տնտեսական ֆորումին:
Իսկ ավելի վաղ՝ նոյեմբերի 18-ին Սիրիայի ԱԳ նախարարը հեռախոսազրույց էր ունեցել Իրանի արտգործնախարար Հոսեյն Ամիր Աբդոլլահիանի հետ: Հեռախոսազրուցի ընթացում նախարարները քննարկել են ինչպես երկկողմ հարաբերությունները և դրանց հետագա զարգացման ուղիները, այլև տարածաշրջանային և միջազգային զարգացումները:
Հետևեք մեզ տելեգրամում
