ՄԱԿ գլխավոր քարտուղար Անտոնիո Գուտերեշը դեկտեմբերի 19-ին հանդիպել է Լիբանանի նախագահ Միշել Աունի հետ:
Հանդիպման ընթացքում Լիբանանի նախագահը վերահաստատել է, որ խորհրդարանական ընտրությունները կկայանան հաջորդ տարի, և դրանք կլինեն «արդար և թափանցիկ»:
Նա նաև կարևորել է բնական ռեսուրսները (մասնավորապես գազը և նավթը) օգտագործելու Լիբանանի անօտարելի իրավունքը: Միևնույն ժամանակ Աունը հաստատել է Իսրայելի հետ անուղղակի բանակցություններ վարելու Լիբանանի պատրաստակամությունը ծովային սահմանների դեմարկացիայի համար:
Իր հերթին գլխավոր քարտուղարը կոչ է արել Լիբանանի քաղաքական գործիչներին մի կողմ դնել իրենց տարաձայնությունները և գործել ի շահ երկրի ու նրա ժողովրդի:
Գուտերեշը ևս կարևորել է հաջորդ տարի անցկացվելիք խորհրդարանական ընտրությունները, որոնք կայուն ապագայի համար «կարևոր հիմքեր են հանդիսանում»:
Նշենք, որ Գուտերեշը Լիբանան էր մեկնել եռօրյա այցով: Նախատեսվում էր, որ նա հանդիպելու է նաև Լիբանանի վարչապետ Նաջիբ Միկաթիի և խորհրդարանի խոսնակ Նաբիհ Բերիի հետ:
Հետևեք մեզ տելեգրամում
