Հունվարի 6-ին Իսրայելի զինված ուժերի տանկերը հարվածներ են հասցրել Սիրիային՝ այս անգամ թիրախավորելով Կունեյտրա նահանգի Ալ-Հուրիյա գյուղը։ Այս մասին տեղեկացնում է սիրիական SANA լրատվական գործակալությունը։
Գործակալության տվյալներով՝ Իսրայելի ԶՈւ-ն «գնդակոծել է Կունեյտրա նահանգը՝ թիրախավորել է Ալ-Հուրիյա գյուղի անտառները, իսկ մոտակայքում պայթյունի ձայներ են լսվել»։ Տուժածների մասին ոչինչ չի հաղորդվել։
Նշենք, որ դեկտեմբերին Իսրայելը երկու անգամ ավիահարվածներ էր հասցրել Սիրիայի Լաթաքիայի առևտրային նավահանգիստը, որի հետևանքով էլ նավահանգստի կոնտեյներային հատվածում հրդեհ էր բռնկվել՝ պատճառելով նյութական վնաս։
Հատկանշական է, որ Լաթաքիան Սիրիայում գտնվող ռուսական զինված ուժերի համար կարևոր տարածք է, քանի որ դրա մոտակայքում է գտնվում Հմեյմիմի ռազմաօդային ռուսական բազան:
Հետևեք մեզ տելեգրամում
