Հունվարի 19-ի երեկոյան Քիրքուքում Իրաքի խորհրդարանի փոխխոսնակ Շախուան Աբդալլահի տան վրա նռնակով հարձակում են իրականացրել:
Իրաքյան լրատվամիջոցները հայտնում են, որ հարձակման հետևանքով տուժածներ չկան:
Հատկանշական է, որ հարձակումը տեղի է ունենում այն ժամանակ, երբ Իրաքի ազգային անվտանգության նախարարների խորհուրդը հունվարի 17-ին որոշում է կայացրել Բաղդադում անվտանգության խիստ միջոցներ կիրառել՝ հնարավոր հարձակումներին դիմակայելու համար:
Իրաքի «Ալ-Սադր շարժում» կուսակցության առաջնորդ Մուկթադա Ալ-Սադրն, արձագանքելով այս իրադարձությանը, ասել է, որ նախկինում ընտրություններին և մեծամասնական կառավարության ձևավորմանն ընդդիմացող քաղաքական ուժերի հետ կապ ունեցող որոշ անձինք դիմում են բռնությունների և թիրախավորում են կուսակցությունների շտաբները:
«Պետք է շտապ կանգնեցնել այդ դեմագոգիկ խմբավորումներին և զսպել նրանց։ Տրամաբանական չէ, որ քաղաքական գործիչը բռնություն կիրառի, եթե չի հասնում իր ուզածին»,- ավելացրել է Ալ-Սադրը Twitter-ի իր միկրոբլոգում:
Ազգային անվտանգության նախարարների խորհուրդը նույնպես հայտարարություն է տարածել՝ մեկնաբանելով այս հարձակումը:
«Մայրաքաղաքում ահաբեկչական գործողություններն ուղղված են սոցիալական խաղաղության և անվտանգության ապակայունացմանը, ուստի կձեռնարկվեն խիստ միջոցներ և կկազմվեն անվտանգության ծրագրեր, որոնք վերջ կտան հանրային անվտանգությանը սպառնացող նման գործողություններին»,- ասված է հայտարարությունում:
Նշենք, որ վերջին օրերի ընթացքում Բաղդադում գրանցվեցին հարձակումների մի շարք դեպքեր, որոնք ուղղված էին քաղաքական գործիչների, քաղաքացիական անձանց և կուսակցությունների շտաբների դեմ՝ օգտագործելով պայթուցիկ սարքեր և ձեռքի նռնակներ:
Հետևեք մեզ տելեգրամում
