Հունվարի 31-ին անօդաչու թռչող սարք է ընկել Իրաքի Սալահ Ալ-Դին նահանգում տեղակայված Speicher (հայտնի է նաև Սահարայի ավիաբազա անվանումով, որը գտնվում է Իրաքի ռազմաօդային ուժերի վերահսկողության ներքո) ռազմաբազայի մոտակայքում: Հայտնի չէ՝ տեխնիկական անսարքության, թե հարձակման նպատակով է անօդաչուն ընկել ռազմաբազայի մոտակայքում:
Նշենք, որ օրեր առաջ Բաղդադի միջազգային օդանավակայանի ուղղությամբ վեց հրթիռներ են արձակվել: Հարձակման հետևանքով վնասվել է մեկ ինքնաթիռ։ Հաղորդվել է, որ ՀՕՊ համակարգի գործողությունների արդյունքում մնացած հրթիռները խոցվել են և ընկել օդանավակայանի մերձակայքում։
Տեղական աղբյուրները հաղորդել են, որ հարձակման թիրախներից էր նաև Բաղդադի միջազգային օդանավակայանում գտնվող «Վիկտորիա» ամերիկյան ռազմաբազան: Այն տեղական ժամանակով ժամը 4:00-ի սահմաններում հարձակման է ենթարկվել անօդաչու թռչող սարքի կողմից, որը սակայն խոցվել է նախքան թիրախին հասնելը:
Ուշագրավ է, որ միայն հունվար ամսին Բաղդադի միջազգային օդանավակայանն արդեն երրորդ անգամ է ենթարկվում հարձակման: Ավելի վաղ հաղորդել էինք, որ դեռևս տարեսկզբին՝ հունվարի 5-ին, օդանավակայանին հարակից Ջիհադ թաղամասից «Կատյուշա» տեսակի չորս հրթիռներ են արձակվել օդանավակայանի ուղղությամբ։ Ըստ տեղական աղբյուրների՝ հրթիռները թիրախավորել են «Վիկտորիա» ռազմաբազան, որտեղ տեղակայված են ԱՄՆ-ի զինված ուժերը։ Իսկ մի քանի օր առաջ Իրաքի անվտանգության ծառայությունը հաղորդել էր, որ երկրի ՀՕՊ-ը խոցել էր երկու անօդաչուներ, որոնք դարձյալ ուղղված էին Վիկտորիա ռազմաբազայի ուղղությամբ։
Հետևեք մեզ տելեգրամում
