Ադրբեջանական ստորաբաժանումները դարձյալ խախտել են հրադադարը Շոշի և Թաղավարդի ուղղությամբ՝ անկանոն կրակ բացելով ՊԲ դիրքերի ուղղությամբ: Տեղեկությունը հայտնում է ԱՀ ՊԲ մամուլի ծառայությունը` հերքելով ադրբեջանական կողմի հերթական ապատեղեկատվությունը։
Նշենք, որ Ադրբեջանի պաշտպանության նախարարությունը հաղորդագրություն է տարածել, համաձայն որի, իբր, ՊԲ ստորաբաժանումները փետրվարի 20-ին և 21-ին կրակ են բացել Շոշ և Թաղավարդ գյուղերի հարակից տարածքում տեղակայված ադրբեջանական դիրքերի ուղղությամբ:
«Ադրբեջանի ՊՆ հաղորդագրության մեջ շարադրված փաստերն ամբողջովին կեղծ են:Հրադադարը նշված հատվածում իրականում խախտել են ադրբեջանական ստորաբաժանումները՝ անկանոն կրակ բացելով ՊԲ դիրքերի ուղղությամբ»,–ասվում է ԱՀ ՊԲ հաղորդագրության մեջ:
Նշվում է, որ ադրբեջանական ստորաբաժանումների կողմից հրադադարի խախտման փաստի մասին հաղորդվել է ՌԴ խաղաղապահ զորակազմի հրամանատարությանը: Հրադադարի խախտման հետևանքով տուժածներ և նյութական վնասներ չկան:
Հիշեցնենք, որ Արցախի Մարտունու շրջանի Թաղավարդ համայնքի հարևանությամբ տեղակայված ադրբեջանական դիրքից փետրվարի 18–ին` ժամը 17։00-ի սահմանում, թիրախավորել ու հրազենային կրակոցներ են արձակել հիշյալ համայնքի բնակելի տների ուղղությամբ։ Կարմիր Շուկա և Թաղավարդ համայնքների հարևանությամբ տեղակայված ադրբեջանական դիրքերից կրակահերթեր էին արձակվել նաև փետրվարի 11-ին։
Հետևեք մեզ տելեգրամում
