Կիրակի իսրայելական «El Al» ավիաընկերության ինքնաթիռն առաջին ուղիղ չվերթն է կատարել Շարմ էլ Շեյխի միջազգային օդանավակայան:
Տեղեկությունը հաստատում է Իսրայելի արտգործնախարարությունը, մինչդեռ եգիպտական կողմը ոչ մի պաշտոնական հայտարարություն չի արել:
«Մենք շատ ուրախ ենք, որ առաջին կոմերցիոն չվերթն ենք իրականացնում Շարմ էլ Շեյխ»,- Twitter-ում գրել է իսրայելական ավիաընկերությունը:
Իր հերթին իսրայելական «KAN» պաշտոնական հեռուստաալիքը տեղեկացրել է, որ իսրայելական «Arkia» և «Israir» ավիաընկերություններն ուղիղ չվերթներ կիրականացնեն Շարմ Էլ Շեյխ՝ ավելացնելով, որ եգիպտական ընկերությունները ևս ուղիղ չվերթներ են իրականացնելու նույն ուղղությամբ:
Հեռուստաալիքի տեղեկացմամբ՝ ավիաընկերություններին ի սկզբանե կթույլատրվի շաբաթական 9 չվերթ իրականացնել։ Հետագայում այս թիվը կավելանա:
Նշենք, որ Եգիպտոսն ու Իսրայելը դեռևս անցյալ տարի համաձայնել էին ուղիղ չվերթներ սկսել Թել Ավիվի Բեն Գուրիոն և Եգիպտոսի Շարմ էլ Շեյխ օդանավակայանների միջև:
Հետևեք մեզ տելեգրամում
