Իրանական Irdiplomacy վերլուծական կայքը թուրքական պետական ԶԼՄ-երում հակաիրանական քարոզչության վերաբերյալ հոդված է հրապարակել: Հոդվածի հեղինակը Թուրքիայի հարցերով փորձագետ Էսլամ Զուլղադրփուրն է:
Հոդվածում հեղինակն անդրադարձել է վերջին շրջանում Anadolu լրատվական գործակալության հակաիրանական հրապարակումներին:
«Այն, որ թուրքական պաշտոնական լրատվական գործակալությունը և Էրդողանի քարոզչական թևը տարածաշրջանի բոլոր խնդիրների, ճգնաժամերի և հումանիտար աղետների մեղքը բարդում են Իրանի քաղաքական գործիչների և Իրանի վրա, մեծ խաբեություն է: Թուրքիայի կառավարության և Ռեջեփ Թայիփ Էրդողանի դերը տարածաշրջանում վերջին տասնամյակի լարվածության, ճգնաժամերի և աղետների մեջ անհերքելի է»,-շեշտել է հեղինակը:
Այդ համատեքստում նա հավելել է, որ Թուրքիան՝
1. Միշտ միջամտում է Իրաքի ներքին գործերին և ռազմական ներկայություն ունի այդ երկրի տարբեր հատվածներում,
2. Աջակցում է ահաբեկչական կառույցների ստեղծմանն ու ամրապնդմանը, ինչպիսիք են՝ ԻՊ-ն, Ալ-Նուսրան և այլք,
3.Ջանքեր է գործադրում տարածաշրջանի երկրների, հատկապես՝ Սիրիայի և Իրաքի օրինական իշխանություններին տապալելու համար,
4. Արաբական երկրներում աջակցում է ծայրահեղական իսլամի հետևորդներին,
-Իրաքյան Քրդստանում և Սիրիայի հյուսիս-արևմուտքում ահաբեկչության դեմ պայքարի պատրվակով էթնիկ ջարդ է իրականացնում,
5. Սահմանափակում է տարածաշրջանի ջրային ռեսուրսները:
Հեղինակը շեշտել է, որ տարածաշրջանում տեղի ունեցած հանցագործությունների և սպանությունների ավելի քան 80 տոկոսը կարելի է վերագրել տարածաշրջանում Էրդողանի ագրեսիվ և էքսպանսիոնիստական քաղաքականությանը:
Հետևեք մեզ տելեգրամում
