Սիրիայի նախագահ Բաշար Ալ-Ասադն աշխատանքային այցով մեկնել էր Թեհրան և հանդիպել Իրանի իսլամական հեղափոխության հոգևոր առաջնորդ Այաթոլլահ Ալի Խամենեիին և երկրի նախագահ Էբրահիմ Ռայիսիին: Տեղեկությունը փոխանցում է SANA լրատվամիջոցը:
Հանդիպման ընթացքում կողմերը կարևորել են սիրիա-իրանական պատմական հարաբերությունները, որոնք հիմնված են երկկողմ համագործակցության և փոխըմբռնման վրա:
Սիրիայի նախագահ Ասադը նշել է, որ ահաբեկչության դեմ պայքարում երկու երկրների մոտեցումներն արդեն ապացուցել են իրենց ճշմարտացիությունը և վերահաստատել շարունակական համագործակցության կարևորությունը:
Իր հերթին Խամենեին ընդգծել է, որ Իրանը կշարունակի աջակցել Սիրիային ահաբեկչության դեմ իր հաղթանակն ավարտելու և երկրի մյուս տարածքներն ազատագրելու համար։
Իսկ Իրանի նախագահը հաստատել է, որ իր երկիրը պատրաստ է ընդլայնել հարաբերությունները Սիրիայի հետ, հատկապես՝ տնտեսական և առևտրային ոլորտներում:
«Թեհրանը կշարունակի բոլոր ձևերով աջակցություն ցուցաբերել Սիրիային և նրա ժողովրդին, հատկապես տնտեսական ծանր պայմաններում», – ասել է Ռաիսին:
Նշենք, որ Իրանի արտգործնախարար Հոսեյն Ամիր Աբդոլլահիանը Twitter-ի իր միկրոբլոգում գրառում է կատարել՝ նշելով որ այս այցը երկկողմ ռազմավարական հարաբերություններում նոր հորիզոններ է բացել:
Հետևեք մեզ տելեգրամում
