Իրանական «Qafqaz» լրատվամիջոցը «Բաքվի և անձամբ Ալիևի հակաիրանական դիրքորոշման և գործունեության ավելի համարձակ դառնալու պատճառները» վերնագրով հոդված է հրապարակել։
«Արցախյան 44-օրյա պատերազմի ավարտից հետո Բաքուն հակաիրանական դիրքորոշումներ որդեգրելու հարցում ավելի համարձակ է դարձել, քան երբևէ։ Անգամ Ադրբեջանի նախագահ Իլհամ Ալիևն է անձամբ անհիմն մեղադրանքներ հնչեցրել Իրանի հասցեին»,- նշված է հոդվածում:
Ընդգծվել է, որ հակաիրանական գործողությունների թվում են Իրանին Ղարաբաղի միջոցով Եվրոպա թմրանյութերի փոխադրելու մեջ մեղադրելը, Ֆիզուլիի շրջանում՝ Իրանի սահմանին, Ալիևի կողմից իսրայելական անօդաչու թռչող սարքը գրկելն ու համբուրելը , և վերջերս Իրանին անուղղակի սպառնալու նպատակով Շուշի քաղաքում հակաիրանական անջատողական տարրերի ներկայությամբ «աշխարհի ադրբեջանցիների համաժողովի» անցկացումը։
Համաձայն հոդվածի՝ այս ընթացքում, թեև Բաքուն փորձել է Իրանի նկատմամբ Ալիևի բացասական դիրքորոշումները հավասարակշռել պաշտոնական հանդիպումներով և Իրանի հետ հարաբերությունների վերաբերյալ որոշ դրական հայտարարություններով, սակայն, ընդհանուր առմամբ, Բաքուն և Ալիևը թշնամաբար են տրամարդրված Իրանի նկատմամբ։
Նշվել է, որ 44-օրյա պատերազմին նախորդող ժամանակաշրջանում Ալիևը չէր համարձակվում հրապարակային մեղադրանքներ հնչեցնել Իրանի հասցեին, սակայն պատերազմում հաղթանակից հետո շատացել են Բաքվի կողմից հնչող հակաիրանական հայատարարությունները, որովհետև Բաքուն զգում է Թուրքիայի և Իսրայելի ռազմական-անվտանգային լուրջ աջակցությունը։
Ըստ հոդվածի՝ Բաքուն ոչ միայն հակաիրանական դիրքորշումներ է արտահայտում, այլև Իրանի դեմ հրապարակային գորոծողություններ է ձեռնարկում՝ համաժողովի հրավիրելով հակաիրանական անջատողական խմբավորման անդամների և ղեկավարների:
«Բաքուն, չնայած երկու երկրների կառավարությունների բարձր մակարդակի հանդիպումներին, այնուամենայնիվ, Իրանին չի ներառում պատերազմական գոտիների վերականգնողական և ականազերծման ծրագրերում»,- նշվել է հոդվածում։
Հոդվածում մատնանշվել է, որ Մեհրիբան Ալիևայի կլանը հակադրվում է Իրանին, իսլամին և շիիզմին՝ փորձելով ստեղծել իսլամի ադրբեջանական մոդելը:
Ընդգծվել է, որ Բաքվի իշխող վերնախավի աջակցությամբ գործող էջերը ակտիվ հակաիրանական քարոզչություն են տանում, բացի այդ ՝ մշակվել է նոր հակաիրանական քարոզչական հարթակ՝ «Ազադ Իրան» մեդիա ցանցը, որն անընդհատ աշխատում է Ադրբեջանի հասարակության մեջ հակաիրանական տրամադրություններ տարածելու ուղղությամբ։
Հետևեք մեզ տելեգրամում
