Իսրայելը համակարգում է ԱՄՆ-ի և Ծոցի երկրների հետ աշխատանքները Սաուդյան Արաբիայի հետ հարաբերությունները կարգավորելու գործընթացում:
«Մենք հավատում ենք, որ հնարավոր է կարգավորել հարաբերությունները Սաուդյան Արաբիայի հետ: Դա մեր շահերի մեջ է մտնում»,- իսրայելական Army Radio-ի հետ զրույցում ասել է Իսրայելի արտգործնախարար Յաիր Լապիդը:
«Մենք արդեն ասել ենք, որ Աբրահամյան համաձայնագրից հետո սա հաջորդ քայլն է՝ խոսելու երկար և զգույշ գործընթացի մասին: Մենք աշխատում ենք ԱՄՆ-ի և Ծոցի երկրների հետ այս ամենի շուրջ», – հավելել է նա՝ նկատի ունենալով 2020 թվականին ԱՄՆ-ի միջնորդությամբ Իսրայելի և Արաբական Միացյալ Էմիրությունների, Բահրեյնի և Մարոկկոյի հետ հարաբերությունների կարգավորման համաձայնագրերը:
Ուշագրավ է, որ ըստ իսրայելական Globes օրաթերթի կիրակնօրյա զեկույցի՝ Լապիդն իր այս մեկնաբանությունները հնչեցրել է այն ժամանակ, երբ տասնյակ իսրայելցի ձեռներեցներ և գործարարներ վերջերս մեկնել էին Սաուդյան Արաբիա՝ իսրայելական ընկերություններում և իսրայելական ներդրումային հիմնադրամներում սաուդական ներդրումների շուրջ բանակցությունների համար:
Իսկ նախորդ շաբաթ Axios-ը հոդված էր հրապարակել, համաձայն որի՝ ԱՄՆ-ի երկու բարձրաստիճան պաշտոնյաներ գաղտնի ժամանել էին Սաուդյան Արաբիա բանակցություններ վարելու համաձայնագրի շուրջ, որը խթանելու է Վաշինգտոնի և Ռիյադի հարաբերությունները՝ միևնույն ժամանակ թագավորությանը մերձեցնելով Իսրայելի հետ հարաբերությունների կարգավորմանը:
Axios-ի տեղեկացմամբ՝ Բայդենի վարչակարգը որպես միջնորդ է հանդես գալիս ավարտին հասնցելու Եգիպտոսից Սաուդյան Արաբիային Տիրան և Սանաֆիր կղզիների հանձնումը:
Կարմիր ծովի այս երկու կղզիները կարևոր տեղ են զբաղեցնում 1979 թվականին ստորագրված իսրայելա-եգիպտական խաղաղության համաձայնագրում, որը Իսրայելի քաղաքացիական և ռազմական նավերին անվտանգ անցում է խոստանում Տիրանի նեղուցների նեղ ջրային ուղիներով:
Հետևեք մեզ տելեգրամում
