Իրաքի Դոհուկ նահանգի Զախո հանգստավայրում թուրքական ռմբակոծությանն անդրադարձել են ԱՄՆ Պետդեպը և Մեծ Բրիտանիայի արտաքին քաղաքական գերատեսչությունը:
Իրաքյան INA պետական լրատվամիջոցի փոխանցմամբ՝ Պետդեպի խոսնակ Նեդ Փրայսը կոչ է արել հարգել Իրաքի ինքնիշխանությունն ու տարածքային ամբողջականությունը:
Իսկ Մեծ Բրիտանիայի արտաքին քաղաքական գերատեսչությունը ցավակցություն է հայտնել տուժածներին՝ նշելով, որ կշարունակի աջակցել Իրաքի՝ այդ թվում Քուրդիստանի շրջանի կայունությանը:
Նշենք, որ երեկ թուրքական ուժերը ռմբակոծել են Իրաքի Դոհուկ նահանգի Զախո զբոսաշրջային հանգստավայրը, որի հետևանքով սպանվել են 9 խաղաղ բնակիչ, վիրավորել՝ 23-ը:
Իրաքի վարչապետը խստորեն դատապարտել է Թուրքիայի գործողությունները՝ դրանք համարելով Իրաքի ինքնիշխանության կոպտագույն խախտում:
Իր հերթին Թուրքիան հերքել է Իրաքի կողմից հնչող մեղադրանքները՝ փորձելով հարձակման մեղքը բարդել քուրդ զինյալների վրա:
Իսկ իրաքյան ԶԼՄ-ները հաղորդել են, որ այսօր Բաղդադում Թուրքիայի դեսպանատան դիմաց բողոքի ակցիաներ են անցկացվել, իսկ Իրաքի վարչապետ Մուստաֆա Ալ-Կազեմին երկրում սուգ է հայտարարել անմեղ զոհերի համար:
Հետևեք մեզ տելեգրամում
