Անկարայի և Դամասկոսի միջև հարաբերությունների կարգավորման հետ կապված առաջիկա շփումները տեղի կունենան Ռուսաստանի և Իրանի միջնորդությամբ: Այս մասին հայտնել է Ռուսաստանի արտգործնախարար Սերգեյ Լավրովը:
«Պայմանավորվածություն է ձեռք բերվել Իրանին այս գործընթացում ընդգրկելու վերաբերյալ»,- հայտարարել է Լավրովը՝ Մոսկվայում իր եգիպտացի գործընկեր Սամեհ Շուքրիի հետ համատեղ մամուլի ասուլիսի ժամանակ:
Լավրովը հավելել է, որ ջանքեր են գործադրվում ռազմական և դիվանագիտական շահագրգիռ պաշտոնյաների միջև ապագա հանդիպումների ժամկետներ սահմանելու ուղղությամբ:
Ուշագրավ է, որ դիվանագիտական աղբյուրը Asharq Al-Awsat-ին հայտնել է, թե Մոսկվան և Անկարան համաձայնության են եկել հարաբերությունների կարգավորման գործընթացում Իրանին ներառելու շուրջ։ Սակայն Անկարան ի սկզբանե դեմ էր Թուրքիա-Սիրիա հարաբերությունների կարգավորման գործընթացում Թեհրանի ընդգրկմանը։
Դիվանագիտական աղբյուրը հավելել է, որ Իրանն էլ իր հերթին է պնդել, թե կարգավորման գործընթացում Թեհրանի ընդգրկվելն անհրաժեշտություն է:
Հետևեք մեզ տելեգրամում
