Երեկ Իսրայելի վարչապետ Բենյամին Նեթանյահուն պաշտոնանկ է արել պաշտպանության նախարար Յոավ Գալանտին, ով դեմ է հանդես եկել Նեթանյահուի նախաձեռնած դատաիրավական բարեփոխումներին:
Գալանտը շաբաթ երեկոյան հայտարարություն էր արել՝ կոչ անելով վարչապետ Նեթանյահուին դադարեցնել դատաիրավական բարեփոխումները և փոխարենը ներգրավվել բանակցություններում՝ փոխզիջման հասնելու համար:
Իսկ Նեթանյահուն նշել է, թե Գալանտը կորցրել է իր վստահությունը և դեմ է գնացել իրեն, երբ ինքը Միացյալ Թագավորություն էր այցելում:
Պաշտոնանկությունից հետո Գալանտը Twitter-ում գրել է, որ «Իսրայել պետության անվտանգությունը միշտ եղել է և կմնա իր կյանքի առաքելությունը»: Իսկ Նեթանյահուն պատասխանել է, թե «բոլորը պետք է դեմ լինեն անհնազանդությանը»։
Հաղորդվում է, որ Նեթանյահուն ունի 48 ժամ պաշտպանության նախարար նշանակելու համար:
Նշենք, որ Իսրայելում դատական բարեփոխումների դեմ բողոքի ցույցերը շարունակվում են արդեն 12 շաբաթ անընդմեջ։ Ըստ ԶԼՄ-ների տեղեկությունների՝ երեկ ավելի քան 600 հազար ցուցարար է դուրս եկել փողոց։ Սա երկրի պատմության մեջ ամենամեծ բողոքն է։
Բենյամին Նեթանյահուի կառավարության առաջարկած դատաիրավական բարեփոխումները ենթադրում են, որ խորհրդարանական մեծամասնություն է որոշելու Գերագույն դատարանի դատավորների ընտրությունը, իսկ դատարանը կկորցնի կառավարության որոշումները բեկանելու ունակությունը։ Բարեփոխումը պետք է քվեարկության դրվի հաջորդ շաբաթ:
Ցուցարարները կարծում են, որ դրա ընդունումը կնշանակի դատարանների անկախության կորուստ։
Հետևեք մեզ տելեգրամում
