Երեկ՝ ապրիլի 24-ին «Քուրդ-հայկական բարեկամություն» կազմակերպության պատվիրակությունն այցելել է Ծիծեռնակաբերդ և ծաղիկներ խոնարհել հայոց ցեղասպանության զոհերի հիշատակին:
«Քուրդ և հայ ժողովուրդները ճնշված ժողովուրդներ են եղել տարածաշրջանում և տարբեր ժամանակներում ցեղասպանության են ենթարկվել»,- Regionmonitor.com կայք հետ զրույցում ասաց «Քուրդ-հայկական բարեկամություն» կազմակերպության ղեկավար, քուրդ գործիչ Հեմն Մամ Ռաշը:
Քուրդ գործչի խոսքով՝ երկու ժողովուրդների միջև բազմաթիվ ընդհանրություններ կան՝ մասնավորապես լեզվի և մշակույթի ոլորտներում: Նմանություններից բացի՝ Ռաշն ընդգծել է նաև երկու ժողովուրդների միջև դարեր շարունակ գոյություն ունեցող պատմական ամուր հարաբերությունները:
«Մենք մտադիր ենք ընդլայնել այդ հարաբերությունները և օգուտ քաղել միմյանց փորձից՝ զարգացնելով քուրդ-հայկական հարաբերությունները տարբեր մակարդակներում»,- նշեց Հեմն Մամ Ռաշը:
Քուրդ ակտիվիստը վստահեցրել է, որ ամեն տարի մասնակցելու են Հայոց ցեղասպանության տարելիցին նվիրված արարողությանը՝ «20-րդ դարասկզբի ամենաողբերգալի կոտորածների զոհերի ընտանիքներին քուրդ ազգի ցավակցությունը նորովի հղելու համար»:
Նշենք, որ «Քուրդ-հայկական բարեկամություն» կազմակերպության պատվիրակությունը Իրաքյան Քուրդիստանի տարածաշրջանային կառավարության Էրբիլ քաղաքից սույն թվականի ապրիլի 22-ին ժամանել էր Երևան՝ հարգանքի տուրք մատուցելու Հայոց ցեղասպանության զոհերի հիշատակին:
Հետևեք մեզ տելեգրամում
