Թուրքիայի և Սիրիայի միջև հարաբերությունների կարգավորումն արագորեն տեղի ունենալ չի կարող՝ հատկապես կապված այն խնդիրների հետ, որոնք պետք է լուծվեն տարաբնույթ հարթություններում: Նման տեսակետ է հայտնել Սիրիայում Թուրքիայի վերջին դեսպան Օմեր Օնհոնը՝ Al Arabiya-ի հետ զրույցում:
Նախկին դեսպանի խոսքով՝ Թուրքիան ձգտում է իր անվտանգությունն ապահովել, ինչպես նաև «անհրաժեշտ պայմաններ ստեղծել փախստականների անվտանգ վերադարձի համար»: Փոխարենը Դամասկոսը պահանջում է թուրքական զինված ուժերի դուրսբերումը Սիրիայից և դադարեցնել ընդդիմությանն աջակցելը:
«Երկու երկրների միջև հարաբերությունների կարգավորման որոշակի առաջընթաց շուտով հնարավոր է, սակայն, կարծում եմ, վերջնական կարգավորման ականատես չենք լինի գոնե նախագահական և խորհրդարանական ընտրություններից առաջ [խմբ.՝ դրանք կայանալու են Թուրքայում մայիսի 14-ին]»,- հավելել է Օմար Օնհոնը:
Բացի այդ, զրույցում թուրք դիվանագետն անդրադարձել է պաշտոնական Դամասկոսի պահանջին՝ Սիրիայի տարածքից թուրքական զինված ուժերի դուրսբերմանը:
«Թուրքիայի բարձրաստիճան պաշտոնյաները հստակորեն նշել են, որ Անկարան, ի վերջո, դուրս կգա Սիրիայից, իսկ թուրքական բանակը երկրի հարավային սահմանները պաշտպանելու համար է»,- նշել է նախկին դեսպանը:
Հետևեք մեզ տելեգրամում
