Մենք պետք է դադարեցնենք օգնություն տրամադրել Ադրբեջանին և նպատակաուղղված պատժամիջոցներ սահմանենք Ալիևի ռեժիմի դեմ: Այս մասին հայտարարել է ԱՄՆ սենատոր Գարի Փիթերսը, ով հայտարարություն է տարածել՝ ամփոփելով Հայաստան կատարած այցը:
«Այս այցը հաստատեց, որ մենք պետք է ավելին անենք հայերի կյանքը պաշտպանելու և էթնիկ զտումները կանխելու համար։ Հայ ժողովրդին ցուցաբերվող օգնության ավելացումը չափազանց կարևոր է, և մենք պետք է դադարեցնենք օգնություն տրամադրել Ադրբեջանին և նպատակաուղղված պատժամիջոցներ սահմանենք Ալիևի ռեժիմի դեմ»,- նշվել է սենատորի տարածած հայտարարության մեջ:
Գարի Փիթերսը համոզմունք է հայտնել, որ Լեռնային Ղարաբաղում պետք է դիտորդներ տեղակայվեն՝ ականատես լինելու, թե ինչ է կատարվում տեղում: Անհրաժեշտ է թույլատրել նաև հումանիտար օգնություն տրամադրող կազմակերպությունների մուտքը տարածաշրջան:
«Ես կշարունակեմ մնալ հայ ժողովրդի և Միչիգանի ուժեղ հայկական համայնքի կողքին և պաշտպանել նրանց»,- շեշտել է սենատորը:
Հետևեք մեզ տելեգրամում
