Իրանի Իսլամական Հանրապետության առողջապահության նախարարության հանրային կապերի և տեղեկատվության կենտրոնի ղեկավար Ք. Ջահանփուրի տեղեկացմամբ՝ վերջին 24 ժամում արձանագրվել է նոր կորոնավիրուսով վարակման 1075 դեպք, որից 75-ը մահվան ելքով: Ընդհանուր առմամբ վարակվել է 10075 մարդ, որից 429-ը մահացել է: Ապաքինվել է 3276 հիվանդ:
Մարտի 12-ին ԻԻՀ արտգործնախարար Մոհամմադ Ջավադ Զարիֆը արժույթի միջազգային հիմնադրամին կոչ է արել աջակցել Իրանին կորոնավիրուսի դեմ պայքարում: Վարակի տարածումը կանխարգելելու համար պաշտոնյաները շարունակում են քաղաքացիներին հորդորել տանից դուրս գալ միայն խիստ անհրաժեշտության դեպքում: Իրանցիներին նաև կոչ են արել զերծ մնալ Նովրուզի օրերին միմյանց այցելելուց:
Սակայն մարտի 12-ին ԻԻՀ առողջապահության նախարարը դժգոհել է, որ չնայած հորդորներին՝ հասարակությունը շարունակում է այնքան էլ լուրջ չվերաբերել կորոնավիրուսին: Ըստ նրա՝ իրանցիները շարունակում են ճամփորդել, քաղաքներում դեռ եռուզեռ է, առևտրի կենտրոններում ՝ նախկինի նման մարդաշատ, փողոցներում ՝ խցանում:
Միաժամանակ, ըստ Թեհրանի քաղաքապետարանի, քաղաքում երթևեկությունը նվազել է 50 տոկոսով: Կորոնավիրուսի պատճառով այս շաբաթ ևս բոլոր նահանգներում չեղարկվել են ուրբաթօրյա աղոթքները: Ավելի վաղ հայտնի էր դարձել, որ չեղարկվել է նաև հոգևոր առաջնորդի նովրուզյան ելույթը:
Ըստ իրանական ԶԼՄ-ների՝ կորոնավիրուս է հայտնաբերվել նաև նախագահի առաջին տեղակալ Էսհաղ Ջահանգիրիի և ևս 2 նախարարի մոտ: Սակայն այս լուրը պաշտոնապես դեռ չի հաստատվել: Հայտնի է նաև, որ կորոնավիրուսից բուժվել է առողջապահության փոխնախարար Իրաջ Հարիրչին:
Հետևեք մեզ տելեգրամում
