Իրանի առողջապահության նախարարությունը նոր տվյալներ է հաղորդել կորոնավիրուսից մահացած հիվանդների, վարակվածների և ապաքինված հիվանդների թվի վերաբերյալ:
- Վերջին 24 ժամվա ընթացքում մահացել է 85 մարդ: Մահացած հիվանդների ընդհանուր թիվը կազմում է 514:
- Վերջին 24 ժամվա ընթացքում վիրուսով վարակված հիվանդների թիվն ավելացել է 1289-ով՝ կազմելով 11364: Ապաքինված հիվանդների թիվը կազմում է 3529:
- Վերջին 24 ժամվա ընթացքում վիրուսն ամենաշատը տարածվել է Թեհրանում (303 դեպք), Մազանդարանում (192 դեպք), Սպահանում (110 դեպք), Խորասան-է Ռազավիում (110 դեպք): Մնացյալ նահանգներում երկնիշ ցուցանիշ է արձանագրվել: Հայաստանի սահմանակից Արևելյան Ատրպատական նահանգում գրանցվել է 92 նոր դեպք, իսկ վարակի օջախ Ղոմում նվազում է նկատվել, արձանագրվել է վարակի 42 դեպք:
Իրանի առողջապահության փոխնախարար Ի. Հարիրչին նշել է, որ մինչև մարտ ամսվա վերջ վիրուսի տարածումը կնվազի, սակայն նա միևնույն ժամանակ հավելել է, որ եթե քաղաքացիներն իրադրությունը լուրջ չընդունեն և չհետևեն հիգիենայի կանոններին, ապա հնարավոր է՝ վիրուսի հետ կապված մինչև մայիս-հունիս ամիսները խնդիրներ լինեն:
Իրանի արտգործնախարար Մ. Ջ. Զարիֆը ՄԱԿ-ի գլխավոր քարտուղար Ա. Գուտերեշին հղած նամակում նշել է Իրանում կորոնավիրուսի տարածման պայմաններում երկրի նկատմամբ սահմանված պատժամիջոցները չեղարկելու անհրաժեշտությունը:
Իրանի ԱԳՆ մամուլի խոսնակ Ա. Մուսավին ի պատասխան ԱՄՆ նախագահ Դ. Թրամփի հայտարարության, նշել է, որ Իրանն ամերիկացի բժիշկների կարիքը չունի: Մուսավին ընդգծել է, որ օգնություն առաջարկելու փոխարեն՝ ԱՄՆ-ն ճիշտ կանի դադարեցնի Իրանի դեմ իրականացվող տնտեսական ահաբեկչությունը:
Կորոնավիրուսով վարակված լինելու նշաններ են հայտնաբերվել ԻԻՀ հոգևոր առաջնորդի՝ միջազգային հարցերով խորհրդական Ալի Աքբար Վելայաթիի մոտ, նա մեկուսացվել է:
Իրանի իսլամական հեղափոխության պահապանների կորպուսի ռազմաօդային ուժերը պատրաստակամություն է հայտնել օդային ճանապարհով տեղափոխել ինչպես բուժաշխատողներին և անհրաժեշտ բժշկական սարքավորումներ:
Իրանի կառավարության անդամները դիմակներով են ներակայանում նիստերին:
Հետևեք մեզ տելեգրամում
