ԱՄՆ-ն կարծում է, որ բոլոր երկրները կարող են ընտրել այն երկրներն ու խմբերը, որոնց հետ հարաբերություններ են հաստատել։ VOA-ի թուրքական ծառայության հարցին ի պատասխան՝ հայտարարել է Սպիտակ տան Ազգային անվտանգության խորհրդի խոսնակը՝ արձագանքելով Կրեմլի բարձրաստիճան պաշտոնյայի հայտարարությանը, որ Թուրքիան դիմել է ԲՐԻԿՍ-ին պաշտոնական անդամակցության համար։ «Մենք ձեզ ուղղորդում ենք թուրքական կառավարությանը՝ իր ծրագրերի հետ կապված պատասխաններ տալու»,- հավելել է նա։
ԲՐԻԿՍ-ին Թուրքիայի անդամակցության հայտի մասին հարցին անդրադարձել է նաև ԱՄՆ Պետքարտուղարության խոսնակ Մեթյու Միլլերը։ Նա նշել է, որ «այլ մեկնաբանություն չունի, քան այն, որ Թուրքիան շարունակում է մնալ Միացյալ Նահանգների կարևոր դաշնակիցը, որի հետ համագործակցում են տարբեր հարցերի շուրջ»։
Հիշեցնենք, որ ՌԴ նախագահի օգնական Յուրի Ուշակովը նախօրեին հայտարարել էր, որ ԲՐԻԿՍ-ի երկրները քննարկելու են Թուրքիայի դիմումը՝ միությանը լիարժեք մասնակցության մասին։
«Թուրքիան լիիրավ անդամակցության հայտ է ներկայացրել։ Դիտարկելու ենք»,- նշել էր նա։
Ավելի վաղ էլ Ուշակովը հայտարարել էր, որ Թուրքիայի նախագահ Ռեջեփ Թայիփ Էրդողանն ընդունել է Կազանում հոկտեմբերի 22-24-ը կայանալիք ԲՐԻԿՍ-ի գագաթնաժողովին մասնակցելու հրավերը։ ԲՐԻԿՍ-ի հիմնադիր երկրներն են Բրազիլիան, Ռուսաստանը, Հնդկաստանը, Չինաստանն ու Հարավային Աֆրիկան։ Ներկայում կազմակերպության անդամ է 9 պետություն՝ Բրազիլիա, Ռուսաստան, Հնդկաստան, Չինաստան, Հարավային Աֆրիկա, Եգիպտոս, Իրան, Եթովպիա և Արաբական Միացյալ Էմիրություններ։
ԱՄՆ-ն արձագանքել է ԲՐԻԿՍ-ին անդամակցելու՝ Թուրքիայի դիմումին
Source:
Factor.am
Հետևեք մեզ տելեգրամումՎերջին լուրեր
